Aldın xabar bergenimizdey, Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov basshılıǵındaǵı respublikamızdaǵı joqarı oqıw orınlarınıń juwapkerlerinen ibarat delegaciya aǵzaları Ózbekstan-Malayziya birinshi bilimlendiriw forumı sheńberinde usı mámlekette xızmet saparında bolıp turıptı.

Birinshi márte ótkerilgen bul forumda eki mámlekettiń joqarı oqıw orınları arasında 50 den aslam shártnama hám memorandumlarǵa qol qoyılıp, ilim hám bilimlendiriw tarawında qospa joybarlardı ámelge asırıw boyınsha kelisimlerge erisildi.

Forum sheńberinde ótkerilgen ilajlarǵa Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı Roxat Eshmuratov hám xalıqaralıq birge islesiw bóliminiń metodisti Alımjan Bimbetovlar da qatnasıp, Malayziyanıń aldınǵı joqarı oqıw orınları menen birge islesiwdi jolǵa qoyıw boyınsha sóylesiwler alıp bardı.

Bunıń nátiyjesinde, Ózbekstan-Malayziya birinshi bilimlendiriw forumı sheńberinde Ájiniyaz atındaǵı Nókis mámleketlik pedagogikalıq institutı hám Malayziyanıń Sultan Idris bilimlendiriw universiteti (UPSI), sonıń menen birge, Aziya-Tınısh okeanı texnologiyalar hám innovaciyalar universiteti (APU) menen birge islesiw boyınsha memorandumlar dúzildi.

Maǵlıwmat ornında atap ótiw orınlı, xalıqaralıq abıroylı reyting shólkemleri tárepinen Malayziyanıń Sultan Idris bilimlendiriw universiteti (UPSI) dúnyanıń «TOP-300»lik dizimine, al Aziya-Tınısh okeanı texnologiyalar hám innovaciyalar universiteti (APU) bolsa «TOP-1000»lıq dizimine kirgizilgen.

Esletip ótemiz, Ájiniyaz atındaǵı Nókis mámleketlik pedagogikalıq institutı Malayziyanıń abıroylı joqarı oqıw orınları menen nátiyjeli birge islesiwdi jolǵa qoyǵan bolıp, 2022-jıldan baslap institutta Lincoln University College joqarı oqıw ornı menen bakalavr, al 2024-jıldan magistratura basqıshlarında qospa bilimlendiriw baǵdarlaması jolǵa qoyılǵan edi.

NMPI baspasóz xızmeti.