Ájiniyaz atındaǵı Nókis mámleketlik pedagogikalıq institutı málimleme-resurs orayında «Ustazım – ómirimniń shıraǵı» atamasındaǵı sáwbetlesiw keshesi bolıp ótti.

Keshege texnika ilimleriniń doktorı, professor Bóribay Dáwletmuratov, málimleme-resurs orayı direktorı Gúlayım Jiyemuratova, oraydıń sırt el málimleme-kitapxana resursları menen islesiw bólimi baslıǵı Rita Amanbaeva, Anıq pánler fakulteti tyutorları hám studentler qatnastı.

Ilajda studentlerge professor Bóribay Kóptilewovichtiń ómiri hám ilimiy-pedagogikalıq jumısları, baspadan shıǵarılǵan monografiya, sabaqlıq hám oqıw qollanbaları haqqında maǵlıwmatlar berildi.

Keshede ustaz Bóribay Dáwletmuratov balalıq dáwirinen baslap ilimge, bilim alıwǵa qızıǵıwshılıǵı joqarı bolǵanlıǵı, ustazları, ilimiy-izertlew jumısları tuwralı aytıp ótip, student-jaslarǵa búgingidey jaratılǵan sharayatlardan nátiyjeli paydalanıp, ilim jolında óz jolın dawam ettiriwi, qábiletlerin jetilistirip barıw arqalı jańa bilimlerdi ózlestiriwi zárúrligi boyınsha másláhátlerin berdi.

Sáwbetlesiw keshesi dawamında jaslar ózlerin qızıqtırǵan sorawlarǵa juwap aldı.

Bul ilaj jaslardı ilim jolında jańa sheklerge baǵdarlawda motivaciyalıq áhmiyetke iye boldı.

NMPI baspasóz xızmeti.