Ájiniyaz atındaǵı Nókis mámleketlik pedagogikalıq institutında «Studentler báhári» festivalı sheńberinde Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Student hám oqıwshılardıń sociallıq belsendiligin arttırıw orayı tárepinen shólkemlestirilgen «Mırza Ulıǵbek áwladları» respublikalıq maqalalar hám shıǵarmalar tańlawınıń final basqıshı bolıp ótti.

Tańlawǵa respublika boyınsha 20 ǵa shamalas joqarı oqıw orınlarınan saylap alınǵan eń bilimli hám qábiletli studentler qatnastı.

Mırza Ulıǵbektiń ómiri hám xızmetleri boyınsha shıǵarma jumısı hám test sınaqlarınan ibarat bolǵan tańlawdıń juwmaqlawshı basqıshında qatnasıwshılardıń dóretiwshilik jumısları tóreshiler quramı aǵzaları tárepinen bahalandı.

Tańlaw juwmaǵında jeńimpazlar hám sıylı orın iyeleri anıqlanıp, diplom, statuetka hám aqshalay sıylıqlandı.

Belsene qatnasqan student-jaslar, tóreshiler hám tańlawdıń final basqıshın joqarı dárejede shólkemlestiriwge úles qosqan institut jámáátine minnetdarshılıq xatları tapsırıldı.

Ilaj qatnasıwshıları hám miymanlar instituttaǵı Ájiniyaz muzeyi menen tanıstı.

NMPI baspasóz xızmeti.