Ájiniyaz atındaǵı Nókis mámleketlik pedagogikalıq institutında ullı mámleketlik ǵayratker hám sárkarda, ilim, mádeniyat hám kórkem óner qáwenderi Sahıpqıran Ámir Temur tuwılǵanınıń 690 jıllıǵına arnalǵan «Temuriyler Renessansı hám Jańa Ózbekstan» atamasındaǵı respublikalıq ilimiy-ámeliy konferenciya bolıp ótti.

Konferenciyanı shólkemlestiriwden baslı maqset – Ámir Temur hám temuriyler dáwirinde qáliplesken joqarı mámleketshilik dástúrler, ilim hám mádeniyattıń rawajlanıw tájiriybesin, sonday-aq, olardı búgingi Jańa Ózbekstannıń rawajlanıw strategiyası menen únles halda úyreniwden ibarat boldı.

Oǵan respublikamızdaǵı aldınǵı joqarı oqıw orınlarınan professor-oqıtıwshılar, ilimiy oraylardan belgili alımlar, jas ilimpazlar hám student-jaslar qatnastı.

Ilajdı institut rektorı w.w.a. Quvondiq Qodirov basqarıp bardı.

Konferenciyada Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı Tatlımurat Atamuratov, Demokratiyalıq processlerdi analizlew orayı Qaraqalpaqstan Respublikası aymaqlıq bólimi baslıǵı, tariyx ilimleriniń doktorı, professor Yaxshibeka Abdullaeva, Ózbekstan Ilimler akademiyası Qaraqalpaqstan bóliminiń úlken ilimiy xızmetkeri, professor Maqset Qarlıbaev, tariyx ilimleriniń doktorı, docent Maman Sarıbaev, instituttıń tariyx tálim baǵdarı 3-kurs studenti, Babur atındaǵı mámleketlik stipendiya tańlawınıń jeńimpazı Jasurbek Nurullaev Sahıpqıran Ámir Temur hám temuriyler dáwiriniń siyasiy, ekonomikalıq, sociallıq hám mádeniy turmısına baylanıslı bayanatların oqıdı.

Atap ótilgenindey, Ámir Temur tiykar salǵan oraylasqan mámleketlik sistema óz dáwiri ushın eń jetilisken basqarıw modeli bolıp, onda ádillik, nızam ústemligi, tártip-qaǵıyda hám kúshli áskeriy strategiya tiykarǵı princip sıpatında ornatılǵan. Bul bolsa aymaqlıq pútinlikti támiyinlew menen birge, ekonomikalıq turaqlılıq hám xalıqtıń abadanlıǵın bekkemlewge xızmet etken. Usı tárepten, Ámir Temur tárepinen alǵa qoyılǵan basqarıw principleri házirgi waqıtta da zamanagóy mámleketlik basqarıw sistemasında áhmiyetli teoriyalıq hám ámeliy áhmiyetke iye ekenligi ayrıqsha kórsetip ótildi.

Konferenciyada temuriyler dáwiri renessans basqıshı sıpatında bahalanıp, bul dáwirde ilim, mádeniyat, arxitektura hám kórkem óner joqarı dárejede rawajlanǵanı ilimiy tiykarlarda dodalandı. Sonıń ishinde, astronomiya, matematika, medicina, tariyx hám ádebiyat tarawlarında erisilgen tabıslar shıǵıs hám jáhán civilizaciyasınıń rawajlanıwına úlken úles qosqanı atap ótildi.

Konferenciya belgilengen sekciyalar boyınsha óz jumısın dawam ettirdi.

NMPI baspasóz xızmeti.