Ájiniyaz atındaǵı Nókis mámleketlik pedagogikalıq institutında Ózbekstan kásiplik awqamları Federaciyasınıń Qaraqalpaqstan Keńesi, Ózbekstan bilimlendiriw hám ilim xızmetkerleri kásiplik awqamı Respublikalıq Keńesi tárepinen «Bilimlendiriw tarawında miynetti qorǵawǵa baylanıslı mashqalalar» atamasındaǵı oqıw-seminarı shólkemlestirildi.

Seminarǵa mákeme, kárxana hám shólkemler, mektepke shekemgi hám mektep bilimlendiriwi sisteması, sonday-aq, joqarı oqıw orınlarınan miynetti qorǵaw boyınsha qánigeler, kásiplik awqamı komitetleriniń basshıları hám tiyisli juwapkerler qatnastı.

Ilajdı Ózbekstan kásiplik awqamları Federaciyası Qaraqalpaqstan Keńesiniń baslıǵı Ulıqbek Jalmenov basqarıp bardı.

Oqıw-seminarında Ózbekstan bilimlendiriw hám ilim xızmetkerleri kásiplik awqamı Respublikalıq Keńesiniń miynetti qorǵaw boyınsha bas qánigesi D.Samarbekov, Qaraqalpaqstan Respublikası Kámbaǵallıqtı qısqartıw hám bántlik ministrligi Mámleketlik miynet inspekciyasınıń inspektorı M.Seydullaev, Ózbekstan kásiplik awqamları Federaciyası Qaraqalpaqstan Keńesiniń miynet-texnikalıq inspektorı B.Utepbergenov tárepinen qatnasıwshılarǵa miynetti qorǵaw tarawındaǵı ámeldegi nızamshılıq, jumıs orınlarında qáwipsiz miynet sharayatların jaratıw, óndiris processlerinde júzege keliwi múmkin bolǵan qáwip-qáterlerdiń aldın alıw hám xızmetkerlerdiń salamatlıǵın qorǵaw máseleleri boyınsha tolıq maǵlıwmatlar berildi.

Seminar dawamında taraw qánigeleri tárepinen bilimlendiriw mákemelerinde ushırasıp atırǵan mashqalalar analizlenip, olardı saplastırıw boyınsha anıq usınıslar bildirildi. Sonday-aq, miynetti qorǵaw mádeniyatın arttırıw, xızmetkerlerdiń huqıqıy sawatlılıǵın kúsheytiw hám qáwipsizlik texnikası qaǵıydalarına ámel etiwdiń áhmiyeti ayrıqsha atap ótildi.

Ilaj sońında qatnasıwshılar ózlerin qızıqtırǵan sorawlarǵa qánigelerden tolıq juwap aldı.

NMPI baspasóz xızmeti.