Ájiniyaz atındaǵı Nókis mámleketlik pedagogikalıq institutı biologiya qánigeliginiń 1-kurs magistrantı Lobarxon Yuldashova Birlesken Milletler Shólkemi Rawajlanıw baǵdarlamasınıń xalıqaralıq tańlawında «Qaraqalpaqstan Respublikasında Nitraria Sibirica ósimliginiń plantaciyasın islep shıǵıw» joybarı menen jeńimpaz boldı hám joybardı ámelge asırıw ushın 8 500 AQSh dolları muǵdarında grant qarjısı ajıratıldı.

Lobarxon Yuldashova ilimiy basshısı biologiya ilimleriniń doktorı, professor Alisher Ajiev penen qurǵaqshılıq hám duzǵa shıdamlı bolǵan Nitraria Sibirica, yaǵnıy aqtiken ósimliginiń bioekologiyalıq ózgeshelikleri hám xalıq xojalıǵındaǵı áhmiyeti boyınsha birneshe jıllardan berli ilimiy-izertlewler alıp barmaqta.

– Joybardı Qanlıkól rayonında ámelge asırıw jobalastırılǵan bolıp, dáslepki basqıshta ósimlik plantaciyasın jaratıwdı maqset etkenbiz. Bul Aralboyınıń degradaciyaǵa ushıraǵan jerlerin tiklew, topıraqtıń shorlanıwınıń aldın alıw, ekologiyalıq turaqlılıqtı támiyinlew hám aymaqtaǵı jasıl zonalardıń kólemin arttırıwǵa xızmet etedi. Sonday-aq, kelesi basqıshta sırt elden tiyisli úskenelerdi alıp kelgen halda, bul ósimlikten jergilikli tábiyiy eko-djem ónimin islep shıǵarıw, onı ishki hám sırtqı bazarlarǵa satıwǵa shıǵarıw arqalı alıs aymaqlarda ekonomikalıq imkaniyatlardı jaratıw baslı maqsetimiz bolıp tabıladı, – deydi Lobarxon biz benen sáwbette.

Maǵlıwmat ornında, Lobarxon Yuldashova birneshe respublikalıq hám xalıqaralıq tańlawlarda, sonday-aq, 2023-2024-oqıw jılında Ibrayım Yusupov atındaǵı mámleketlik stipendiya tańlawında jeńimpaz bolǵan.

NMPI baspasóz xızmeti.