Búgin, 15-aprel kúni Telegram tarmaǵındaǵı «Hoja.uz» kanalında Nókis mámleketlik pedagogikalıq institutınıń málimleme-resurs orayındaǵı kitaplardıń saqlanıwı menen baylanıslı múrájat járiyalandı.

Usı múrájat boyınsha Ájiniyaz atındaǵı Nókis mámleketlik pedagogikalıq institutı tómendegilerdi bildiredi:

Institut málimleme-resurs orayınıń oqıw hám elektron zalları bas imarattıń 2-qabatında, kitaplar fondınıń bir bólegi 3-qabatında, al tiykarǵı bólegi bolsa 2-sanlı oqıw imaratında jaylasqan.

Videokórinislerdegi kitaplar instituttıń 2-sanlı oqıw imaratındaǵı málimleme-resurs orayınıń tiykarǵı kitap fondı bolıp, ol jerde qurılıs-ońlaw jumısları alıp barılıwına baylanıslı waqıtsha saqlaw ushın bas imarattıń tómengi qabatına jaylastırılǵan edi.

Qalalıq kanalizaciya tarmaqlarınıń waqıtsha islemewine baylanıslı bas imarattıń tómengi qabatında suw shıǵıw jaǵdayı júzege keldi. Mashqala óz waqtında anıqlanıp, tiyisli qánigeler tárepinen saplastırıw jumısları alıp barıldı. Bul jaǵdayda kitaplarǵa hám jumıs islewshilerge hesh qanday zıyan jetpedi.

Qurılıs-ońlaw jumısları jedel pátlerde juwmaqlanıp, kitaplar fondı sol kúnniń ózinde 2-sanlı oqıw imaratına kóshirildi.

NMPI baspasóz xızmeti.