Ájiniyaz atındaǵı Nókis mámleketlik pedagogikalıq institutında korrupciyaǵa qarsı gúresiw, jámiyette hadallıq hám ashıq-aydınlıq principlerin bekkemlew maqsetinde instituttıń basshı xızmetkerleri menen ushırasıw shólkemlestirildi.

Ushırasıwǵa Ózbekstan Respublikası Bas prokuraturası janındaǵı Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarması jámiyetshilik penen baylanıslar hám huqıqıy málimleme bóliminiń inspektorı A.Allambergenov, Puqaralıq baslamaların qollap-quwatlaw orayı Qaraqalpaqstan aymaqlıq bóliminiń direktorı G.Jollıbekova, instituttıń aǵa yuriskonsultı B.Arzieva hám korrupciyaǵa qarsı gúresiw «Komplaens qadaǵalaw» sistemasın basqarıw bóliminiń baslıǵı Sh.Shamuratov qatnastı.

Atap ótilgenindey, bilimlendiriw tarawında korrupciya bolajaq qánigelerdiń sapasın tómenletedi, bilim emes, máp ústin bolıp qalıwına sebep boladı. Sonıń menen birge, korrupciyalıq jaǵdaylar bilimlendiriw sistemasınıń abıroyına úlken zıyan jetkeredi.

Ilajda tiykarınan institutta korrupciyalıq jaǵdaylardı keltirip shıǵaratuǵın sebep hám sharayatlardı tallawǵa ayrıqsha itibar qaratılıp, mámleketimizde korrupciyaǵa qarsı gúresiw baǵdarında ámelge asırılıp atırǵan reformalar haqqında sóz etildi.