Ájiniyaz atındaǵı Nókis mámleketlik pedagogikalıq institutında Ózbekstan kásiplik awqamları federaciyası Qaraqalpaqstan Respublikası Keńesi baslaması menen 28-aprel – Dúnya júzilik miynetti qorǵaw kúnine arnalǵan «Salamat psixologiyalıq-sociallıq jumıs ortalıǵın támiyinleymiz» atamasındaǵı ilaj hám dógerek sáwbeti bolıp ótti.

Ilajǵa respublikamızda jumıs alıp barıp atırǵan barlıq mákeme hám kárxanalar, ministrlikler, shólkemler, basqarmalar, densawlıqtı saqlaw, huqıq qorǵaw, transport hám energetikalıq uyımlardan, sonday-aq, bilimlendiriw mákemeleri hám joqarı oqıw orınlarınan wákiller qatnastı.

Qatnasıwshılar dáslep hár bir mákeme hám shólkemlerdiń miynetti qorǵaw baǵdarında ámelge asırıp atırǵan jumısları, sonday-aq, jumıs procesinde texnikalıq qáwipsizlikti támiyinlewge kómeklesetuǵın ásbap-úskenelerdiń kórgizbesi menen tanıstı.

Bunnan soń ilaj qatnasıwshıları menen dógerek sáwbeti shólkemlestirildi.

Ilaj sheńberinde «Miynetti qorǵaw hám qáwipsizlik boyınsha jámáátlik qadaǵalawdı shólkemlestiriw» respublikalıq tańlawınıń Qaraqalpaqstan Respublikası basqıshı jeńimpazları sıylıqlandı.

Áhmiyetlisi, tańlawda Ájiniyaz atındaǵı Nókis mámleketlik pedagogikalıq institutı Ózbekstan bilimlendiriw hám ilim xızmetkerleri kásiplik awqamı tarawında «Eń jaqsı kárxana» nominaciyası boyınsha jeńimpaz dep tabıldı.

Institut kásiplik awqamı komiteti baslıǵı Karamatdin Gúlimbetovqa diplom hám bahalı sawǵalar saltanatlı túrde tapsırıldı.

NMPI baspasóz xızmeti.