Ájiniyaz atındaǵı Nókis mámleketlik pedagogikalıq institutı málimleme-resurs orayı tárepinen student-jaslar arasında kitapqumarlıq mádeniyatın jetilistiriw hám keń túrde úgit-násiyatlaw maqsetinde VI Respublikalıq kitapqumarlar hápteligi ilajları shólkemlestirildi.

«Kitap – mánili ómir tiykarı» atamasındaǵı hápteliktiń ashılıw máresimine Ózbekstan Respublikasında xızmet kórsetken jurnalist A.Óteniyazova, Qaraqalpaqstan medicina institutı málimleme-resurs orayınıń direktorı Q.Nawrızbaeva, instituttıń pedagogika kafedrası professorı T.Saparbaev, málimleme-kitapxana resursların toplaw, kataloglastırıw hám sistemalastırıw bólimi baslıǵı B.Tóreeva, sırt el málimleme-kitapxana resursları menen islew bólimi baslıǵı R.Amanbaeva, Filologiya fakulteti professor-oqıtıwshıları hám student-jaslar qatnastı.

Ilajdı málimleme-resurs orayı direktorı G.Jiyemuratova basqarıp bardı.

Sózge shıqqanlar kitapqumarlıq hápteliginiń áhmiyeti, onıń jámiyette kitapqumarlıq mádeniyatın rawajlandırıwdaǵı ornı, jaslar arasında kitap oqıwǵa bolǵan qızıǵıwshılıqtı arttırıw baǵdarındaǵı jumıslar haqqında maǵlıwmatlar berdi.

Hápteliktiń ashılıw máresimi jaslar arasında kitapqumarlıqtı úgit-násiyatlawǵa baǵdarlanǵan viktorinalıq oyınlar, soraw-juwaplar, sonday-aq, talantlı studentler atqarıwındaǵı muzıkalıq bólim menen dawam etti.

NMPI baspasóz xızmeti.