Ózbekstan Respublikası Mektepke shekemgi hám mektep bilimlendiriwi ministriniń orınbasarı Azizbek Turdiev basshılıǵındaǵı juwapker wákiller Ájiniyaz atındaǵı Nókis mámleketlik pedagogikalıq institutına keldi.

Ministr orınbasarı dáslep instituttıń jańadan qurıp pitkerilgen bas imaratı hám bul jerdegi málimleme-resurs orayı, IT-inkubaciya orayı, registrator ofisi, sonday-aq, jaslardıń sport penen shuǵıllanıwı ushın jaratılǵan sharayatlar menen tanıstı.

Belgili qaraqalpaq klassik shayırı Ájiniyaz Qosıbay ulınıń 200 jıllıǵı múnásibeti menen shólkemlestirilgen Ájiniyaz muzeyindegi eksponatlar menen tanısıp, óz tileklerin estelikler kitabına jazıp qaldırdı.

Bunnan soń «HAYAT GROUP» JShJ menen birgelikte mámleketlik-jeke menshik sheriklik tiykarında qurılıp atırǵan instituttıń 500 orınǵa mólsherlengen 6 qabatlı jańa studentler turaq jayınıń qurılıs jumısların kózden ótkerdi.

Bul jerde tiyisli juwapkerler menen qurılıs jumıslarınıń barısı haqqında pikir almasıp, qurılıstı óz waqtında sapalı etip juwmaqlaw boyınsha tiyisli usınısların bildirdi.

NMPI baspasóz xızmeti.