Ájiniyaz atındaǵı Nókis mámleketlik pedagogikalıq institutı Anıq pánler fakultetinde «Piyshembi – jaslar kúni» múnásibeti menen bir qatar ruwxıy-aǵartıwshılıq hám mádeniy ilajlar, ushırasıwlar shólkemlestirildi.

Atap aytqanda, fakultet student-jasları arasında turaqlı túrde ótkerilip kiyatırǵan «Bilim ring» intellektual turniriniń 12-tur oyını Qaraqalpaqstan Respublikası Joqarǵı Keńesi Baslıǵı Amanbay Orınbaevtıń bayanatı tiykarında tayarlanǵan «Qaraqalpaqstan rawajlanıw jolında» atamasındaǵı oqıw-metodikalıq qollanba tiykarında dúzilgen sorawlardan ibarat boldı. Bul arqalı student-jaslar elimizde xalqımızdıń abadan turmısın támiyinlew jolında ámelge asırılıp atırǵan jumıslar, keń kólemli reformalar haqqında maǵlıwmatlarǵa iye boldı.

Sonday-aq, jaslar arasında korrupciyaǵa qarsı gúresiwdi úgit-násiyatlaw maqsetinde ushırasıw shólkemlestirildi. Onda instituttıń korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı Sh.Shamuratov qatnasıp, korrupciyanıń unamsız aqıbetleri, onıń aldın alıw jolları hám jaslardıń bul baǵdardaǵı juwapkershiligi haqqında aytıp ótti. Ushırasıw pikir almasıw hám soraw-juwaplar menen dawam etti.

Fakultette fizika-matematika ilimleriniń doktorı, akademik Polat Habibullaevtıń tuwılǵanına 90 jıl tolıwı múnásibeti menen eslew keshesi shólkemlestirildi. Keshede ilimpazdıń ómir jolı, ilimiy jumısı, ilimniń rawajlanıwına qosqan úlken úlesi haqqında sóz boldı. Sonday-aq, onıń ilimiy miyrası hám jas áwlad ushın ibratlı bolǵan tárepleri ayrıqsha atap ótildi.