Búgin, 30-aprel kúni Ájiniyaz atındaǵı Nókis mámleketlik pedagogikalıq institutında Rossiya Federaciyası Tatarstan Respublikası Ilimler akademiyası A.X.Xalikov atındaǵı Arxeologiya institutı hám Moskva mámleketlik universiteti wákilleri menen ushırasıw bolıp ótti.

Ushırasıwǵa A.X.Xalikov atındaǵı Arxeologiya institutınıń direktorı, tariyx ilimleriniń doktorı, professor Ayrat Sitdikov, usı instituttıń úlken ilimiy xızmetkerleri Renat Valiev, Antonina Gubaydullina, Moskva mámleketlik universitetinen izertlewshiler Nikolay Tkach, Elena Lısenko, sonday-aq, institut rektoratı, Tariyx fakulteti dekanatı wákilleri qatnastı.

Ilajda institut rektorı w.w.a. Quvondiq Qodirov miymanlardı elimizge saparı menen qutlıqlap, Ózbekstan hám Rossiya joqarı oqıw orınları, ilimiy orayları arasındaǵı birge islesiw jumıslarınıń rawajlanıp atırǵanlıǵına toqtaldı.

Atap ótiw kerek, Rossiya hám Qazaqstannıń belgili ilimpazları menen birgelikte Nókis rayonı aymaǵındaǵı «Kerder» mádeniyatına tiyisli «Haywanqala» tariyxıy esteliginde 2023- hám 2024-jıllarda xalıqaralıq ekspediciya sheńberinde arxeologiyalıq qazıw jumısları alıp barılǵan edi.

Bıyılǵı xalıqaralıq arxeologiyalıq ekspediciya 3-30-may kúnleri aralıǵında ótkeriliwi belgilengen bolıp, házirgi waqıtta institut tárepinen tayarlıq jumısları tolıq juwmaqlandı.

Ushırasıwda ekspediciya dawamında ámelge asırılatuǵın jumıslar belgilep alındı.

Ilaj sońında miymanlar instituttaǵı Ájiniyaz muzeyinde bolıp, bul jerdegi eksponatlar, tariyxıy qoljazba kitaplar menen tanıstı.

NMPI baspasóz xızmeti.