Ájiniyaz atındaǵı Nókis mámleketlik pedagogikalıq institutında Tashkent qalası hám wálayatlardaǵı joqarı oqıw orınları student-jasları qatnasıwında ótkerilip atırǵan «Doslıq festivalı» sheńberinde saltanatlı ilaj shólkemlestirildi.

Ilajda institut rektorı w.a. Quvondiq Qodirov sózge shıǵıp, milletler aralıq tatıwlıq, jaslardıń awızbirshiligin támiyinlew hám mádeniy birge islesiwdi ele de bekkemlewge xızmet etetuǵın bul festival student-jaslardıń bos waqtın mazmunlı shólkemlestiriw menen birge olardıń óz ara tájiriybe almasıwı, doslıq qatnasıqların bekkemlewi hám túrli aymaqlardıń mádeniyatı, úrp-ádet hám qádiriyatları menen tanıstırıwda áhmiyetli platforma wazıypasın atqaratuǵınlıǵın atap ótti.

Festivaldı shólkemlestiriwde ayrıqsha belsendilik kórsetken hám birge islesiw jumısların bekkemlewge úles qosqan joqarı oqıw orınları rektorlarına minnetdarshılıq xatları, delegaciyalardıń basshıları, sonday-aq, instituttıń juwapkerlerine húrmet jarlıqları tapsırıldı.

Sonıń menen birge, festivalda belsene qatnasqan miyman student-jaslar húrmet jarlıqları hám sawǵalar menen sıylıqlandı.

Ilaj sheńberinde miymanlar ushın bayram dasturqanı jayılıp, talantlı student-jaslar atqarıwındaǵı koncert baǵdarlaması qatnasıwshılar názerine usınıldı.

NMPI baspasóz xızmeti.