Gúlistan mámleketlik universiteti professorı, pedagogika ilimleriniń doktorı Raximov Baxtiyor Xudoyberdievich Ájiniyaz atındaǵı Nókis mámleketlik pedagogikalıq institutına keldi.

Institut rektorı w.a. Quvondiq Qodirov penen bolıp ótken ushırasıwda búgingi kúnde eki joqarı oqıw ornı arasında jolǵa qoyılǵan birge islesiw baylanısların bunnan bılay da bekkemlew máseleleri dodalandı. Atap aytqanda, professor-oqıtıwshılar hám studentler arasında tájiriybe almasıwdı shólkemlestiriw, qospa ilimiy-izertlewler alıp barıw, respublikalıq hám xalıqaralıq kólemdegi ilimiy konferenciyalardı birgelikte shólkemlestiriw boyınsha usınıslar bildirildi.

Sonday-aq, jas ilimpazlar, erkin izleniwshiler hám doktorantlardıń ilimiy izleniwlerin qollap-quwatlaw, olardıń innovaciyalıq baslamaların ámeliyatqa engiziw, jańa redakciyada qabıl etilgen «Bilimlendiriw haqqında»ǵı Nızamda belgilep berilgen inklyuziv bilimlendiriw formasın nátiyjeli engiziw máseleleri keń túrde dodalandı. Institutta inklyuziv bilimlendiriw ortalıǵın qáliplestiriw, bilimlendiriw procesinde zamanagóy pedagogikalıq texnologiyalardan paydalanıw boyınsha ámeliy usınıslar ortaǵa qoyıldı.

Ushırasıw sońında birge islesiwdi ele de keńeytiw, ilimiy-pedagogikalıq jumıslarda qospa joybarlardı ámelge asırıw boyınsha aldaǵı wazıypalar belgilep alındı.