Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 2-kurs studentleri qánigelik ámeliyat sheńberinde respublikamız faunasın úyreniw maqsetinde dala ámeliyatı jumısların alıp bardı.

Qánigelik ámeliyatqa professor A.Saparov, docent A.Turekeeva, PhD K.Eshanov hám assistent-oqıtıwshı D.Sadikovlar basshılıq etti.

Ámeliyat dawamında studentler Nókis qalası hám onıń átirapında, sonıń ishinde, Qızılqum shóli, Ashshıkól aymaǵı, instituttıń ilimiy-tájiriybe maydanı, Tómengi Ámiwdárya mámleketlik biosferalıq rezervatı, «Qoskól-3» hám «Qutlı qonıs» mákan puqaralar jıyınları, sonday-aq, «Grachyovaya rosha», Ózbekstan Respublikası Ilimler akademiyası Qaraqalpaqstan bólimi Birlesken tábiyiy pánler institutı Botanika baǵında ushıraytuǵın haywanat dúnyası wákillerin baqlaw jáne úyreniw jumısların ámelge asırdı.

Dala ámeliyatı procesinde studentlerge aymaqlarda ushıraytuǵın omırtqalı hám omırtqasız haywanlardıń túrler quramı, jasaw ortalıǵı, ekologiyalıq ózgeshelikleri hám olardı qorǵaw máseleleri boyınsha ámeliy kónlikpeler berildi. Sonday-aq, haywanlardı baqlaw, dizimge alıw hám ilimiy maǵlıwmatlar toplaw usılları ámeliyatta qollanıldı.

Bul ámeliyat studentlerdiń zoologiya hám ekologiya pánleri boyınsha alǵan teoriyalıq bilimlerin bekkemlew, faunalıq izertlewler alıp barıw kónlikpelerin qáliplestiriw jáne Qaraqalpaqstan aymaǵınıń biologiyalıq kóptúrliligin tereń úyreniwge xızmet etpekte.