Ájiniyaz atındaǵı Nókis mámleketlik pedagogikalıq institutında pitkeriwshi kurs studentleri tárepinen tayarlanǵan pitkeriw qánigelik jumıslarınıń qorǵaw processleri dawam etpekte.

Qorǵaw procesi tastıyıqlanǵan keste tiykarında fakultetler kesiminde shólkemlestirilip, onda Mámleketlik attestaciyalıq komissiya aǵzaları, professor-oqıtıwshılar hám ilimiy basshılar qatnaspaqta.

– Tábiyiy pánler fakultetin bıyılǵı oqıw jılında ulıwma 240 student pitkeriwi kútilmekte. Sonnan ximiya tálim baǵdarı boyınsha 58, biologiya tálim baǵdarı boyınsha 55, geografiya tálim baǵdarında 54, fizika tálim baǵdarında 31 hám texnologiyalıq tálim baǵdarı boyınsha 42 student pitkermekte, – deydi fakultet dekanı Qarjawbay Reymov.

Fakultette pitkeriw qánigelik jumısların qorǵaw procesi joqarı dárejede shólkemlestirilgen bolıp, studentler ózleriniń ilimiy izleniwleriniń nátiyjeleri, saylanǵan temanıń aktuallıǵı, ámeliy áhmiyeti, sonday-aq, usınılǵan usınıslardı prezentaciyalar arqalı kórsetip bermekte.

Pitkeriw qánigelik jumısların bahalaw procesinde temanıń ilimiy jańalıǵı, teoriyalıq hám ámeliy áhmiyeti, izertlew metodlarınan nátiyjeli paydalanılǵanlıǵı, sonday-aq, studenttiń erkin pikirlew hám óz kózqarasın tiykarlay alıw kónlikpelerine ayrıqsha itibar qaratılmaqta.

Qorǵaw ilajları studentlerdiń iyelegen bilim, kónlikpe hám tájiriybelerin kórsetiw, olardıń kásiplik tayarlıq dárejesin anıqlaw hám aldaǵı miynet jolına puqta tayar ekenligin bahalawda áhmiyetli basqısh bolıp tabıladı.

NMPI baspasóz xızmeti.