Ájiniyaz atındaǵı Nókis mámleketlik pedagogikalıq institutında pitkeriw qánigelik jumısların qorǵaw processleri sheńberinde oqıwda joqarı nátiyjelerge erisken, instituttıń jámiyetlik jumıslarında belsene qatnasqan hám óziniń úlgili minez-qulqı menen teńleslerine órnek bolǵan belsendi pitkeriwshi studentlerdiń ata-analarına minnetdarshılıq xatları tapsırıldı.

Ilaj dawamında perzentleriniń tálim-tárbiyasına ayrıqsha itibar qaratıp, olardıń hár tárepleme kamalǵa keliwinde múnásip úles qosqan ata-analarǵa institut rektorı w.a. Quvondiq Qodirovtıń atınan qızǵın minnetdarshılıq bildirildi. Atap ótilgenindey, jaslardıń jetiskenlikleri hám tabıslarında shańaraq, oqıw ornı hám jámiyettiń birge islesiwi áhmiyetli orın iyeleydi.

Minnetdarshılıq xatların tapsırıw procesi kóterińki ruwxta ótip, ata-analar tárepinen bildirilgen jaqsı tilekler hám qızǵın pikirler ilajǵa jáne de joqarı keypiyat baǵıshladı. Bunday ilajlar perzent tárbiyasına juwapkershilik penen qatnas jasap atırǵan ata-analarǵa kórsetilgen joqarı húrmettiń kórinisi bolıp, jaslardı jáne de úlken sheklerge qaray umtılıwǵa túrtki beredi.

NMPI baspasóz xızmeti.