Ájiniyaz atındaǵı Nókis mámleketlik pedagogikalıq institutında magistratura basqıshı pitkeriwshileriniń magistrlik dissertaciyalarınıń qorǵawı joqarı dárejede shólkemlestirilmekte.

Qorǵaw processlerinde magistrantlar eki jıl dawamında alıp barǵan ilimiy-izertlew jumıslarınıń nátiyjelerin mámleketlik attestaciyalıq komissiyası aǵzaları aldında prezentaciya etip, óz izertlewleriniń teoriyalıq hám ámeliy áhmiyetin tiykarlap bermekte.

Dissertaciyalardı bahalawda izertlew temasınıń aktuallıǵı, ilimiy jańalıǵı, ámeliyat penen úziliksiz baylanısı, avtordıń ózbetinshe ilimiy izleniw alıp barıw potencialı hám islep shıǵılǵan usınıslardıń ámeliy áhmiyetine ayrıqshı dıqqat qaratılmaqta.

Ulıwma pedagogika kafedrasında qorǵaw processleri belgilengen tártip hám kriteriyalar tiykarında, ashıq-aydınlıq hám qalıslıq principlerine qatań ámel etken halda ótkerilmekte.

– Qorǵaw procesi magistrantlardıń ilimiy potencialı, kásiplik tayarlıǵı hám óz qánigeligi boyınsha iyelegen bilim hám kónlikpelerin kórsetiwdiń áhmiyetli basqıshı bolıp esaplanadı, – deydi professor Ayjan Nawrızbaeva.

Maǵlıwmat ornında, bıyılǵı oqıw jılında instituttı ulıwma 4422 pitkeriwshi, sonnan magistratura basqıshın 225 magistrant pitkerip shıǵıwı kútilmekte.

NMPI baspasóz xızmeti.