Usı jıldıń 18-19-iyun kúnleri Surxandárya wálayatı Termiz ekonomika hám servis institutında joqarı oqıw orınları studentleri arasında náshebentlikke qarsı gúresiw hám salamat turmıs tárizin úgit-násiyatlawǵa baǵdarlanǵan «Jaslar – náshebentlikke qarsımız!» tańlawınıń respublikalıq final basqıshı bolıp ótti.

Student-jaslardıń náshebentlik, psixotrop hám kúshli tásir etiwshi zatlarǵa qarsı gúresiw baǵdarındaǵı bilim jáne kónlikpelerin bahalaw, joqarı oqıw orınlarında náshebentliktiń zıyanlı aqıbetleri haqqındaǵı túsiniklerdi keń úgit-násiyatlaw, sonday-aq, dóretiwshilik arqalı salamat turmıs tárizin en jaydırıwdı maqset etken tańlawǵa aymaqlıq basqıshlarda jeńimpaz bolǵan hám sıylı orınlardı iyelegen ulıwma 30 komanda qatnastı.

Qatnasıwshılar shıǵarma jazıw, súwret salıw, qısqa videorolikler, saxnalıq kórinis shártleri tiykarında óz qábiletlerin kórsetiwge háreket etti.

Eń quwanıshlısı, tańlaw juwmaqlarına bola, Ájiniyaz atındaǵı Nókis mámleketlik pedagogikalıq institutınıń «Nur» komandası sıylı 2-orındı iyeledi hám shólkemlestiriwshiler tárepinen diplom, sonday-aq, 150 million sum muǵdarında aqshalay sıylıqlandı.

Institutımız jasların respublikalıq tańlawda qolǵa kirgizgen tabısları menen qutlıqlaymız!

NMPI baspasóz xızmeti.