Paytaxtımız Nókis qalasında jaslardıń ilimiy hám innovaciyalıq baslamaların qollap-quwatlawǵa baǵdarlanǵan «Bolajaq alım» ilimiy ideyalar tańlawınıń jeńimpazların saltanatlı sıylıqlaw máresimi bolıp ótti.

Ilajǵa Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Jaslardıń innovaciyalıq baslamaların qollap-quwatlaw ofisiniń direktorı Akbarxon Sobirxonov qatnasıp, tańlaw jeńimpazlarına sıylıqlardı tapsırdı.

Quwanıshlısı, jeńimpazlar arasında Ájiniyaz atındaǵı Nókis mámleketlik pedagogikalıq institutı Tábiyiy pánler fakulteti biologiya tálim baǵdarınıń 2-kurs studentleri Shahzoda Abıllaeva («HydroSave» joybarı menen) hám Umida Sháribaeva («SmartThermoBox» joybarı menen) sıylıqlandı.

Maǵlıwmat ushın, bul tańlaw jaslardıń ilimiy potencialın arttırıw, olardıń ilim, texnologiya hám innovaciya baǵdarlarındaǵı jańa joybarların xoshametlew hám ámeliyatqa engiziw maqsetinde shólkemlestirildi.

Tańlaw juwmaǵında saylap alınǵan eń jaqsı ilimiy ideya avtorlarınıń miyneti múnásip atap ótilip, joybarlardı rawajlandırıw imkaniyatı berildi.

NMPI baspasóz xızmeti.