Prezidentimiz Shavkat Mirziyoyev basshılıǵında sırt el hám qońsılas mámleketler menen birge islesiw, ilim, bilimlendiriw tarawın jańa basqıshqa alıp shıǵıw baǵdarındaǵı ámelge asırılıp atırǵan reformalar óz nátiyjesin bermekte.

Xabarıńız bar, 2024-jılı Ájiniyaz atındaǵı Nókis mámleketlik pedagogikalıq institutı hám Qazaqstan Respublikası Astana qalasındaǵı L.N.Gumilyov atındaǵı Evraziya milliy universiteti arasında qospa bilimlendiriw baǵdarlaması shólkemlestirilgen edi. Usı tiykarda magistraturanıń qazaq tili hám ádebiyatı, biologiya, sonday-aq, ximiya qánigelikleri boyınsha qos diplomlı baǵdarlama jolǵa qoyıldı.

Ayrıqsha atap ótiw kerek, bul iygilikli baslamanıń ámelge asıwına instituttıń qazaq, túrkmen tili hám ádebiyatı kafedrasınıń baslıǵı, docent Írıstı Quttımuratova úlken úles qostı. Onıń ilim hám bilimlendiriw tarawınıń rawajlanıwı menen birge xalıqlar arasındaǵı doslıq jáne birge islesiwdi bekkemlewde de ayrıqsha ornı bar.

Astana qalasında usı qospa bilimlendiriw baǵdarlaması tiykarında oqıǵan jaslarǵa magistrlik diplomları saltanatlı túrde tapsırıldı.

Álbette, bul xalıqaralıq baylanıslarımızdıń ámeliy nátiyjesi bolıp tabıladı.

NMPI baspasóz xızmeti.