Búgin, 26-iyun kúni Ájiniyaz atındaǵı Nókis mámleketlik pedagogikalıq institutında 2026-2027-oqıw jılı ushın qabıllaw procesine arnalǵan baspasóz konferenciyası bolıp ótti.

Ilajda institut rektorı w.a. Quvondiq Qodirov ǵalaba xabar quralları wákillerine bıyılǵı qabıllaw procesindegi áhmiyetli jańalıqlar haqqında maǵlıwmatlar berdi.

Atap ótilgenindey, institutta bıyılǵı qabıllaw procesindegi tiykarǵı jańalıqlardıń biri bakalavriattıń mektepke shekemgi tálim baǵdarında dual bilimlendiriwdiń jolǵa qoyılıp atırǵanı bolıp esaplanadı. Bunda mámleketlik hám mámleketlik emes mektepke shekemgi bilimlendiriw shólkemlerinde jumıs alıp barıp atırǵan orta arnawlı maǵlıwmatlı pedagog kadrlar háptede bir kún institutta, bes kún mektepke shekemgi bilimlendiriw shólkeminde tólemli kontrakt tiykarında oqıw imkaniyatına iye boladı.

Sonday-aq, institutta jańadan jasalma intellekt, antropologiya hám etnologiya bakalavr tálim baǵdarları, úlkenler tálimi (andragogika), social-gumanitar pánlerdi oqıtıw metodikası (huqıq tálimi), tariyx magistratura qánigelikleri ashılmaqta.

Sózge shıqqanlar bıyıl mámleketlik joqarı oqıw orınları bakalavriatına qabıllaw procesi 2 basqıshta ámelge asırılatuǵınlıǵı, ayrıqsha qábilet talap etiletuǵın bakalavriat tálim baǵdarlarına qabıllaw ushın kásiplik (dóretiwshilik) imtixanlar instituttıń ózinde, sonday-aq, basqa tálim baǵdarları boyınsha test sınaqları Bilimdi bahalaw agentligi tárepinen ajıratılǵan orınlarda ótkeriliwi belgilengenligi, olardı shólkemlestiriw boyınsha joqarı dárejede tayarlıqlar alıp barılıp atırǵanı haqqında atap ótti.

Qabıllaw procesin joqarı dárejede shólkemlestiriw, abiturientler hám olardıń ata-analarına áhmiyetli másláhátler, huqıqıy jol-jobalar, tarawdaǵı jańalıqlar hám ózgerisler haqqında tolıq maǵlıwmat beriw maqsetinde institutta qabıllaw komissiyası hám onıń quramında koll-orayınıń jumısı jolǵa qoyılǵanlıǵı jáne turaqlı jumıs islep turǵanlıǵı boyınsha maǵlıwmat berdi.

Ilajda qabıllaw procesindegi jańalıqlar hám ózgerisler haqqında ǵalaba xabar quralları wákilleri qızıqtırǵan sorawlarına juwap aldı.

NMPI baspasóz xızmeti.