Ázerbayjan Respublikası Mádeniyat ministrligi tárepinen Birinshi Túrkologiyalıq Qurıltaydıń 100 jıllıǵı múnásibeti menen belgili ilim hám mádeniyat ǵayratkerleri, mámleketlik hám húkimetlik wákiller, túrkiy tilli mámleketler menen baylanıslı tiyisli shólkemlerdiń basshıları, puqaralıq jámiyeti wákilleri qatnasıwında «Túrkiy dúnya hápteligi» shólkemlestirildi.

Ájiniyaz atındaǵı Nókis mámleketlik pedagogikalıq institutı Filologiya fakulteti qazaq, túrkmen tili hám ádebiyatı kafedrasınıń professorı, filologiya ilimleriniń doktorı Turǵanbay Kerwenov háptelik sheńberinde Baku qalasında ótkerilgen «Birinshi Túrkologiyalıq Qurıltay: júz jıllıq ilimiy-mádeniy miyras» atamasındaǵı xalıqaralıq kongresske qatnasıp qayttı.

Háptelik sheńberinde xalıqaralıq kongress penen birgelikte ilimiy konferenciyalar, filmler, spektakl hám kitaplar prezentaciyaları, kórgizbeler, koncert baǵdarlaması hám basqa bir qatar ilajlar bolıp ótti.