Ájiniyaz atındaǵı Nókis mámleketlik pedagogikalıq institutı muzıkalıq tálim kafedrasınıń professorı, Ózbekstan xalıq bilimlendiriw aǵlası, Qaraqalpaqstan Respublikasına miyneti sińgen kórkem óner ǵayratkeri, qaraqalpaq xalqınıń milliy alamoynaq duwtarı sazların notaǵa túsirgen belgili ilimpaz Allanazarov Dáwletmurat Tóreshovich dúnyadan ótti.

Dáwletmurat Allanazarov 1957-jıl 9-aprelde Nókis qalasında tuwılǵan. Ol kishkeneliginen kórkem óner hám muzıkaǵa ayrıqsha ıqlas qoydı hám usı baǵdarda bilim aldı.

Dáslepki miynet jolın 1975-jılı Nókis mámleketlik muzıka-xoreografiyalıq oqıw ornında ulıwma fortepiano oqıtıwshısı, koncertmeyster sıpatında baslanǵan bolsa, 1982-jıl Tashkent mámleketlik konservatoriyasınıń kúndizgi bólimin tabıslı tamamladı.

Oqıwın pitkerip kelgennen keyin dáslepki jumıs ornında fortepiano oqıtıwshısı, koncertmeyster, keyin ala Berdaq atındaǵı Qaraqalpaq mámleketlik muzıkalı teatrında simfoniyalıq orkestr dirijyorı bolıp jumıs isledi hám respublikalıq kólemdegi úlken koncertlerde, qońsılas mámleketlerde ótkerilgen xalıqaralıq ilajlarda belsene qatnastı.

1993-jıldan usı kúnge shekem Ájiniyaz atındaǵı Nókis mámleketlik pedagogikalıq institutında assistent-oqıtıwshılıqtan kafedra professorı dárejesine shekem qábiletli jaslarǵa bilim berip, elimizdiń kórkem óner tarawınıń rawajlanıwı, joqarı potenciallı maman qánigeler menen támiyinleniwi, sonday-aq, ilimiy jaqtan izertleniwine salmaqlı úles qostı.

Ilimiy izleniwleri dawamında milliy qádiriyatlarımızdı qayta tiklew hám keleshek áwladlarǵa jetkerip beriw baǵdarında úlken nátiyjelerge eristi.

Dáwletmurat Allanazarov kóp dáwirlerden berli ustazdan shákirtke shınjırma-shınjır ótip kiyatırǵan qaraqalpaq milliy alamoynaq duwtarı namaları ústinde izlenip, olardı notaǵa túsirdi. Bunıń nátiyjesinde «Qaraqalpaq xalıq sazları», «Qaraqalpaq sazları (duwtar)» hám «Altın miyras» atamasındaǵı oqıw qollanbaları, balalar muzıka hám kórkem óner mektepleriniń 1-, 2-, 3-, 4- hám 5-klassları ushın arnalǵan «Qaraqalpaq milliy alamoynaq duwtarı sazendeshiligi sabaqlıǵı» atamasındaǵı kitabı baspadan shıqtı. Sonıń menen birge, onıń avtorlıǵında joqarı hám orta arnawlı oqıw orınları ushın «Qaraqalpaq ırǵaqları» hám «Qosıq aytsam» atamasındaǵı oqıw qollanbaları baspaǵa tayarlandı.

Xalıqaralıq shólkemler tárepinen járiyalanǵan joybarlar sheńberinde Ózbekstan Ilimler akademiyası Qaraqalpaqstan bólimi fondında saqlanıp kiyatırǵan xalıq qosıqları jáne dástanların jańalaw hám zamanagóy audiojazıwlarǵa túsiriw jumıslarına belsene qatnastı.

Kóplegen ilimiy maqalaları hám tezisleri «Xabarshı», «Ámiwdárya», «Ilim hám jámiyet», «Ózbekstan pedagogikalıq ilimiy-izertlew institutı» jurnallarında, respublikalıq hám xalıqaralıq konferenciyalar toplamlarında jarıq kórdi.

Usınday pidayı xızmetleriniń nátiyjesinde Dáwletmurat Allanazarov institutımız jámááti menen birgelikte respublikamızdıń ilim, bilimlendiriw, kórkem óner hám mádeniyat tarawında joqarı mártebege iye boldı.

Marhumnıń xalqımız iygiligi, elimizdiń mádeniyat hám kórkem óner tarawınıń rawajlanıwı jolında islegen xızmetleri, sonday-aq, jarqın esteligi búgingi hám keleshek áwladlar júreginde máńgi saqlanıp qaladı.

Ájiniyaz atındaǵı Nókis mámleketlik pedagogikalıq institutı rektoratı, jámiyetlik shólkemleri, Pedagogika-psixologiya hám dóretiwshilik tálim fakulteti, muzıkalıq tálim kafedrasınıń miynet jámááti.