Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew hám olardıń isbilermenlik baslamaların qollap-quwatlawǵa baǵdarlanǵan «Keleshekke qádem» baǵdarlaması sheńberinde gezektegi seminar-trening shólkemlestirildi.

Ilajǵa «Ózmilliybank» akcionerlik jámiyeti Qaraqalpaqstan Respublikası filialı qánigesi K.Sharipova, instituttıń «Keleshekke qádem» orayı baslıǵı N.Tańbaev, registrator ofisi qánigeleri, fakultet dekanatları wákilleri, pitkeriwshi kurs studentleri qatnastı.

Seminardıń tiykarǵı maqseti – pitkeriwshi jaslardı miynet bazarına tayarlaw, olardıń kásiplik kónlikpelerin bekkemlew, jumısqa ornalasıw procesinde zárúr bolatuǵın bilim hám kónlikpelerdi qáliplestiriw hám isbilermenlik jumısların baslawǵa kómeklesiwden ibarat.

Seminar-trening dawamında qánigeler tárepinen miynet bazarında talap joqarı bolǵan kásip hám baǵdarlar, biznes reje islep shıǵıw tiykarları, startap joybarlardı jolǵa qoyıw hám qarjılandırıw imkaniyatları, jeńillikli kreditler hám mámleketlik baǵdarlamalar haqqında tolıq maǵlıwmatlar berildi.