Mámleketlik joqarı hám kásiplik bilimlendiriw mákemelerine oqıwǵa kiriw test sınaqlarında qatnasqan abiturientler 2026-jıl 25-iyuldan 8-avgustqa shekem 15 kún dawamında joqarı oqıw orınları hám tálim baǵdarların saylawı kerek.

Bunıń ushın my.uzbmb.uz platformasınıń «Joqarı hám kásiplik bilimlendiriw mákemelerine qabıllaw» bólimine kirip, «Xızmetten paydalanıw» túymesi basıladı hám «JOO saylaw» bólimine ótiledi.

Dáslep abiturient «Tańlaw ústemligi» hám «Maqsetli qabıllaw» boyınsha óz tańlawın ámelge asıradı.

Bunnan soń abiturient test tapsırǵan pánler kompleksi hám oqıtıw tiline sáykes bolǵan besewge shekemgi joqarı oqıw ornı jáne tálim baǵdarın oqıtıw forması menen birge saylaydı.

Bunda tálim baǵdarların bir joqarı oqıw ornı yamasa túrli joqarı oqıw orınları sheńberinde saylaw múmkin.

Tálim baǵdarların saylap, «Saqlaw» túymesi basıladı, soń maǵlıwmatlardı tastıyıqlaw ushın abiturienttiń telefon nomerine SMS xabar jiberiledi. SMS xabardaǵı kodtı baǵdarlamaǵa kirgiziw arqalı maǵlıwmatlar tastıyıqlanadı.

Maǵlıwmatlar tastıyıqlanǵannan keyin, «Abiturientti dizimge alıw beti» qáliplesedi. Dizimge alıw betinde abiturient saylaǵan tańlaw ústemligi, oqıtıw formaları, joqarı oqıw orınları hám tálim baǵdarları sáwlelengen boladı. Júklep alıw túymesi arqalı abiturient dizimge alıw betin júklep alıwı múmkin.

Eskertiw: Abiturient tálim baǵdarların saylaw múddeti juwmaqlanǵanǵa shekem óz maǵlıwmatların ózgertiwi hám dizimge alıw betin qayta júklep alıwı múmkin.

Abiturientlerdiń studentlikke usınıs etilgen yamasa etilmegeni haqqındaǵı juwmaqlawshı tańlaw nátiyjeleri tálim baǵdarların saylaw basqıshı tolıq juwmaqlanǵannan soń bir hápte múddette járiyalanadı.

NMPI baspasóz xızmeti.