Ministrler Kabinetiniń 376-sanlı qararı (14.08.2023-j.) menen tastıyıqlanǵan reglamentke tiykar 1-avgusttan baslap studentler arzaların my.gov.uz portalı arqalı jiberiwi múmkin.

Reglamentke muwapıq, dáslep jeńillik hám ústemliklerge iye talabanlar studentler turaq jaylarına qabıl etiledi.

Bunnan soń, ulıwma dizimdegi studentler ushın jataqxanada artıp qalǵan orınlar sanına qaray náwbet tiykarında tómendegishe bólistiriledi:

1-kurs studentleri ushın 55 – 65 procent;

2-kurs studentleri ushın 15 – 20 procent;

3-kurs hám onnan joqarı kurs studentleri ushın 20 – 25 procentke shekem ajıratıladı.

Arzalardı qabıllaw 1-avgusttan baslap oqıw jılı juwmaǵına shekem dawam etedi.

Maǵlıwmat ushın, 2026-2027-oqıw jılında JOO 1-basqıshına usınıs etilgen abiturientler juwmaqlawshı nátiyje shıqqannan soń arza jiberiwi múmkin boladı. Olar ushın da orınlar joqarıdaǵı tártip tiykarında ajıratıladı.

Studentler ushın qolaylıq: Endi studentler turaq jayına ornalasıw hám waqıtsha dizimnen ótiw kompozit (birlestirilgen) xızmet arqalı avtomatikalıq túrde ámelge asırıladı.

Qanday ózgeris boldı?

Burın studentler turaq jayına ornalasqannan soń waqıtsha dizimnen ótiw ushın óz aldına hújjet jıynap, basqa uyımlarǵa múrájat etiw talap etiletuǵın edi. Endi bul xızmetler birlestirildi – artıqsha waqıt jumsalıwı hám áweregershiliklerge zárúrlik qalmadı!

Studentler turaq jayına arzańız kórip shıǵılıp, elektron shártnama hám jollama usınıladı.

Shártnamada kórsetilgen tólemdi ámelge asırıwıńız benen kompozit xızmet iske qosıladı hám waqıtsha dizimge alıw ushın tólem qáliplesedi.

Dizimnen ótiw tólemin ámelge asırǵannan soń, sizge turǵan jerińiz boyınsha dizimge alınǵanıńız haqqında dizimge alıw beti usınıladı.

Áhmiyetli eskertiw: Turǵan jeri boyınsha waqıtsha dizimge alıw múddeti tólem ámelge asırılǵan kúnnen baslap shártnamada kórsetilgen múddetke shekem ámel etedi.

NMPI baspasóz xızmeti.