Ájiniyaz atındaǵı Nókis mámleketlik pedagogikalıq institutında korrupciyalıq jaǵdaylardıń aldın alıw, onıń unamsız aqıbetlerin keń jámiyetshilikke túsindiriw, sonday-aq, student-jaslar arasında hadallıq hám nızamlılıq principlerin bekkemlew maqsetinde úgit-násiyat ushırasıwı shólkemlestirildi.

Ushırasıwǵa Qaraqalpaqstan Respublikası Ministrler Keńesi Komplaens xızmeti bas qánigesi N.Berdiniyazova, Bas prokuratura janındaǵı Ekonomikalıq jınayatlarǵa qarsı gúresiw departamenti Qaraqalpaqstan Respublikası basqarmasınıń jámiyetshilik penen baylanıslar hám huqıqıy málimleme bólimi inspektorı A.Allambergenov, instituttıń korrupciyaǵa qarsı gúresiw «Komplaens-qadaǵalaw» sistemasın basqarıw bóliminiń baslıǵı Sh.Shamuratov, sonday-aq, student-jaslar qatnastı.

Ilaj dawamında korrupciya jámiyetlik rawajlanıw, bilimlendiriw sapası jáne puqaralardıń mámleketlik hám jámiyetlik institutlarǵa bolǵan isenimine keri tásir etetuǵın faktorlardıń biri ekenligi atap ótildi. Korrupciyaǵa qarsı gúresiwde tiyisli shólkemler menen birge hár bir puqaranıń sanası, juwapkershiligi hám belsendi puqaralıq poziciyası ayrıqsha áhmiyetke iye esaplanadı.

Bilimlendiriw procesinde ashıq-aydınlıqtı támiyinlew, mápler soqlıǵısıwına jol qoymaw, paraxorlıq hám basqa korrupciyalıq jaǵdaylarǵa mawasasız qatnastı qáliplestiriw – búgingi kúnniń tiykarǵı wazıypalarınıń biri.

Ushırasıwda student-jaslarǵa korrupciyaǵa baylanıslı huqıqbuzarlıqlardıń huqıqıy aqıbetleri, bunday jaǵdaylarǵa dus kelgende múrájat etiw tártibi hám korrupciyanıń aldın alıwda jámiyetlik qadaǵalawdıń ornı haqqında túsinikler berildi.

NMPI baspasóz xızmeti.