Ájiniyaz atındaǵı Nókis mámleketlik pedagogikalıq institutında Koreya Respublikasınıń Sun Moon universiteti xalıqaralıq baylanıslar boyınsha dekanı Choi Jae Sung menen ushırasıw bolıp ótti.

Ushırasıwǵa institut rektorı w.a. Quvondiq Qodirov, prorektorlar hám tiyisli juwapkerler qatnasıp, eki joqarı oqıw ornı arasındaǵı birge islesiwdi jolǵa qoyıw, xalıqaralıq bilimlendiriw joybarların ámelge asırıw hám óz ara baylanıslardı rawajlandırıw máseleleri boyınsha pikir almasıldı.

Atap ótiw orınlı, bul ushırasıw Ózbekstan hám Koreya Respublikası arasındaǵı baylanıslar jedel túrde rawajlanıp atırǵan dáwirge tuwra kelmekte. Usı jıldıń 13-16-sentyabr kúnleri Prezidentimizdiń usı mámleketke mámleketlik saparı sheńberinde eki mámleket arasındaǵı strategiyalıq sheriklik qatnasıqların bekkemlew maqsetinde tariyxıy kelisimlerge erisilgen edi.

Ushırasıwda usınday joqarı dárejedegi baylanıslar nátiyjesinde jaratılıp atırǵan jańa imkaniyatlar, sonıń ishinde, joqarı oqıw orınları arasındaǵı birge islesiwdi keńeytiwdiń áhmiyetli ekenligi atap ótildi.

Sáwbetlesiw barısında jasalma intellekt, IT, ekologiya hám tábiyiy resurslar baǵdarında «2+2» baǵdarlamasın jolǵa qoyıw, koreys tilin oqıtıwdı jetilistiriw, professor-oqıtıwshılar hám studentlerdiń akademiyalıq mobilligin rawajlandırıw, óz ara tájiriybe almasıw, birgelikte xalıqaralıq grantlar hám ilimiy-izertlew jumısların ámelge asırıw máseleleri dodalanıp, aldaǵı wazıypalar belgilep alındı.

Ushırasıwdan soń miymanlar institutta shólkemlestirilgen «Koreya múyeshi», sonday-aq, Ájiniyaz muzeyi menen tanıstı.

NMPI baspasóz xızmeti.