AQShtıń Ózbekstandaǵı elshixanası wákili, elshixana missiyasındaǵı juwaplı xızmetker Heather Byrnes xanım Ájiniyaz atındaǵı Nókis mámleketlik pedagogikalıq institutına keldi.

Institut rektorı w.a. Quvondiq Qodirov, oqıw isleri boyınsha prorektorı Muxtar Ibragimov, inglis tili hám ádebiyatı kafedrasınıń baslıǵı Dina Mamırbaeva menen bolıp ótken ushırasıwda AQSh elshixanası wákilleri birneshe jıllar dawamında jolǵa qoyılǵan nátiyjeli birge islesiw, bilimlendiriw tarawında ámelge asırılıp atırǵan qospa baǵdarlamalardı rawajlandırıw baǵdarındaǵı jumısları ushın institut basshılarına minnetdarshılıq bildirdi.

Ushırasıw dawamında tárepler birge islesiwdiń áhmiyetli baǵdarları, atap aytqanda, Access English Scholarship Program, UNICEN, COIL (Collaborative Online International Learning) baǵdarlamaları, sonday-aq, Fulbright ETA English Fellow Program sheńberindegi birge islesiw nátiyjelerin dodaladı.

Atap ótiw orınlı, usı joybarlar sheńberinde sırt elli oqıtıwshılar institutta inglis tili hám ádebiyatı tálim baǵdarında oqıp atırǵan studentler menen islesip, olardıń til kónlikpelerin, xalıqaralıq dialog hám mádeniyatlar aralıq kompetenciyaların rawajlandırıwǵa kómeklespekte.

Ushırasıw sońında birge islesiwdi bunnan bılay da rawajlandırıw, bilimlendiriw tarawında jańa baslamalar hám joybarlardı ámelge asırıw, studentler, professor-oqıtıwshılar ushın xalıqaralıq imkaniyatlardı keńeytiw boyınsha aldaǵı wazıypalar belgilep alındı.

NMPI baspasóz xızmeti.