Házirgi waqıtta bilimlendiriw sistemasında zamanagóy, ámeliyatqa baǵdarlanǵan hám miynet bazarı talaplarına say kadrlar tayarlaw áhmiyetli wazıypalardıń biri bolıp tabıladı. Ásirese, pedagog kadrlardı tayarlaw procesinde teoriyalıq bilim menen birge, tikkeley ámeliy jumıs dawamında zárúr kónlikpe hám kompetenciyalardı qáliplestiriw ayrıqsha áhmiyetke iye.

Ájiniyaz atındaǵı Nókis mámleketlik pedagogikalıq institutında dual bilimlendiriw formasınıń nátiyjeli jolǵa qoyılıw bilimlendiriw procesin ámeliyat penen ele de jaqınlastırıw, bolajaq qánigelerdiń kásiplik tayarlıǵın bekkemlewge xızmet etpekte.

2026-2027-oqıw jılınan baslan institutta bakalavriattıń mektepke shekemgi tálim baǵdarında dual bilimlendiriw forması jolǵa qoyıldı hám oǵan mektepke shekemgi bilimlendiriw shólkemlerinde jumıs islep atırǵan orta arnawlı maǵlıwmatlı 400 den aslam pedagog kadr qabıl etildi.

Dual bilimlendiriwdiń tiykarǵı ózgesheligi – student joqarı bilimlendiriw shólkeminde teoriyalıq bilimlerdi iyelew menen birge, óz kásiplik jumısın ámeliyat penen úylesimli túrde dawam ettiredi. Bul bolsa oqıw procesinde iyelengen bilimlerdi real jumıs sharayatında sınap kóriw, bekkemlew hám jetilistiriw imkaniyatın beredi. Yaǵnıy, dásturiy bilimlendiriwde student dáslep teoriyalıq bilimlerdi iyelep, keyin ámeliyat procesinde olardı qollanıwǵa háreket etse, dual bilimlendiriwde bul eki process parallel túrde alıp barıladı.

Bunday qatnas pedagogika tarawında, ásirese, mektepke shekemgi tálim baǵdarında ayrıqsha áhmiyetke iye. Óytkeni, pedagogtıń kásiplik sheberligi tek ǵana teoriyalıq bilimler menen emes, sonıń menen birge, balalar menen islew, tálim-tárbiya procesin shólkemlestiriw, zamanagóy pedagogikalıq metodlardan paydalanıw sıyaqlı ámeliy kónlikpeler menen de belgilenedi.

Institutta dual bilimlendiriwdi shólkemlestiriw tiyisli shólkemler menen birgelikte, izbe-iz hám sistemalı túrde ámelge asırıldı.

Oqıtıw procesi «5+1» baǵdarlaması tiykarında (5 kún jumıs hám 1 kún oqıw) aymaqlıq jaqtan qolaylı bolıwı ushın qala hám rayonlar kesiminde – Nókis qalası, Shımbay, Qońırat hám Ellikqala rayonlarındaǵı tayanısh mektepke shekemgi hám mektep bilimlendiriwi mákemelerinde oraylasqan tártipte shólkemlestirildi.

Bul bolsa aymaqlarda jumıs islep atırǵan pedagoglardıń óz jumıs ornınan uzaqlaspaǵan halda joqarı maǵlıwmat alıwı, teoriyalıq bilimlerin ámeliy jumısları menen tikkeley baylanıstırıwı ushın qolaylı sharayat jaratadı.

Búgin bilimlendiriw sapasına qoyılıp atırǵan talaplar artıp baratırǵan bir sharayatta dual bilimlendiriw – teoriya hám ámeliyattı birlestiretuǵın, bilim alıwshını real kásiplik jumısqa tayarlaytuǵın hám maman kadrlar tayarlaw nátiyjeliligin arttıratuǵın zamanagóy bilimlendiriw modeli sıpatında óziniń aktuallıǵın kórsetpekte.

Institutta bul baǵdardıń izbe-iz rawajlanıwı bolsa bilimlendiriw hám ámeliyat arasındaǵı úylesimlilikti bunnan bılay da bekkemlep, elimizde zamanagóy pedagog kadrlar tayarlaw sapasın jańa basqıshqa alıp shıǵıwǵa xızmet etedi.

NMPI baspasóz xızmeti.