Ájiniyaz atındaǵı Nókis mámleketlik pedagogikalıq institutında jaslar arasında doslıq, óz ara húrmet hám mádeniy kóp túrlilikti ele de bekkemlew, studentler arasında awızbirshilik hám keńpeyillikti úgit-násiyatlaw maqsetinde «Ózbekstan – ulıwma úyimiz!» súreni tiykarında «Biz – bir shańaraq perzentlerimiz» atamasındaǵı milletler aralıq tatıwlıq hám doslıq festivalı shólkemlestirildi.

Festivalǵa Din isleri boyınsha komiteti Qaraqalpaqstan Respulikası aymaqlıq basqarmasınan, sonday-aq, elimizde jumıs alıp barıp atırǵan milliy-mádeniy oraylardıń wákilleri, institut professor-oqıtıwshıları, tyutorlar hám student-jaslar qatnastı.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov, sonday-aq, miymanlar sózge shıǵıp, házirgi globallasıw dáwirinde milletler aralıq tatıwlıq, óz ara awızbirshilik, doslıq qatnasıqları jámiyetimiz hám mámleketimizdiń hár tárepleme rawajlanıwında úlken áhmiyetke iye baǵdarlardıń biri ekenligin atap ótti.

Festival sheber qollı, ónerment hám sportshı jaslardıń kórgizbesi menen baslanǵan bolsa, «Tumaris» xalıq ansambli hám talantlı student-jaslar atqarıwındaǵı koncert baǵdarlaması bayram qatnasıwshılarına kóterińki keypiyat inám etti.

Festivalda student-jaslar qaraqalpaq, ózbek, qazaq hám túrkmen xalıqlarınıń milliy úrp-ádet jáne dástúrlerinen saxnalıq kórinisler kórsetip, birgelikte túrli millet wákilleriniń yoshlı qosıqlarına ayaq-oyınlarǵa tústi hám festivaldıń joqarı dárejede ótiwine úleslerin qostı.

Maǵlıwmat ornında atap ótiw kerek, házirgi waqıtta Ájiniyaz atındaǵı Nókis mámleketlik pedagogikalıq institutında 13 mıńnan aslam student-jaslar bilim alıp atırǵan bolıp, oqıw dárgayında qaraqalpaq, ózbek, qazaq, túrkmen, rus, ukrain, koreys, qırǵız, tájik, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte bilim almaqta.

Institutta usı baǵdardaǵı ilajlar turaqlı ótkeriliwi belgilengen.

NMPI baspasóz xızmeti.