Ájiniyaz atındaǵı Nókis mámleketlik pedagogikalıq institutında Jaslar awqamı baslanǵısh shólkemi baslaması menen student-jaslardıń ruwxıy dúnyaqarasın bayıtıw, milliy mádeniyat hám kórkem ónerge bolǵan qızıǵıwshılıǵın arttırıw, olarda milliy qádiriyatlarǵa húrmet sezimlerin bekkemlew maqsetinde Qaraqalpaqstan xalıq jırawı Jánibek Piyazov hám Ózbekstan mámleketlik filarmoniyası Qaraqalpaqstan Respublikalıq bólimi qosıqshısı Uzaqbergen Doshbaev penen dóretiwshilik ushırasıwı shólkemlestirildi.

Joqarı dárejede hám kóterińki ruwxta ótken ushırasıw dawamında kórkem óner sheberleri ózleriniń dóretiwshilik jumısları, kórkem óner jolındaǵı izleniwleri hám turmıslıq tájiriybeleri menen bólisti. Sonday-aq, milliy muzıka ónerin qásterlep-saqlaw, jas áwladqa jetkeriw hám onıń rawajlanıwına úles qosıwdıń áhmiyeti haqqında pikirlerin bildirdi.

Ásirese, qaraqalpaq xalıq jırawshılıq óneri, onıń bay tariyxı hám ózine tán dástúrleri, xalıq awızeki dóretiwshiligi úlgilerin keleshek áwladqa jetkeriw máseleleri qatnasıwshılarda úlken qızıǵıwshılıq oyattı.

Ushırasıw dawamında studentler ózlerin qızıqtırǵan sorawlardı berip, kórkem óner ǵayratkerleri menen sáwbetlesti.

NMPI baspasóz xızmeti.