Ájiniyaz atındaǵı Nókis mámleketlik pedagogikalıq institutında toy hám shańaraqlıq máresimlerdi ıqsham etip ótkeriw máselelerine arnalǵan baspasóz konferenciyası bolıp ótti. Ilaj Ózbekstan máhálleleri awqamı wákilleri, «Mahalla Media» JShJ hám awqamnıń aymaqlıq basqarması menen birgelikte shólkemlestirildi.

Konferenciyanı Ózbekstan máhálleleri awqamı Qaraqalpaqstan Respublikası basqarmasınıń baslıǵı Saǵındıq Turmanov basqarıp bardı.

Ilajda toylardı milliy úrp-ádetlerimizge say túrde, artıqsha dábdebe hám qárejetlersiz ótkeriw, shańaraqlardı qarızǵa batıwdan saqlaw hám jaslarda únemlilik mádeniyatın qáliplestiriw máseleleri dodalandı.

Atap ótilgenindey, toydıń shırayı dábdebede emes, miyrim-shápáát, shın júrekten bildirilgen tilekler hám jaqınlardıń duwası menen ólshenedi. Bir kúnlik saltanat dep, jıllar dawamında qarız tólewge májbúr bolıw hesh bir shańaraqqa quwanısh alıp kelmeydi.

Baspasóz konferenciyasında máhálle belsendileri, ata-analar hám keń jámiyetshilik arasında túsindiriw jumısların kúsheytiw, jaslardı toylardı óz imkaniyatına qarap, artıqsha sarp-qárejetlersiz ótkeriwge shaqırıw áhmiyetli ekenligi haqqında sóz boldı.

NMPI baspasóz xızmeti.