Ájiniyaz atındaǵı Nókis mámleketlik pedagogikalıq institutında «Piyshembi – jaslar kúni» hám «Huqıqbuzarlıqlar profilaktikası kúni» múnásibeti menen student-jaslardıń kiberqáwipsizlik boyınsha bilimlerin arttırıw, internet tarmaǵında ushırasatuǵın hár qıylı qáwip-qáter hám aldawshılıqlardan eskertiw jáne kiberjınayatlardıń aldın alıw maqsetinde úgit-násiyat ushırasıwı shólkemlestirildi.

Ilajǵa Qaraqalpaqstan Respublikası Ishki isler ministrligi Kiberjınayatlarǵa qarsı gúresiw basqarması aǵa inspektorı, leytenant Shahruh Yuldashov hám instituttıń hayal-qızlar profilaktikalıq inspektorı Miyrigúl Narımbetova qatnastı.

Ushırasıw dawamında búgingi kúnde sanlı texnologiyalar hám internetten paydalanıw imkaniyatları keńeyip atırǵanı menen bir qatarda, kiberjınayatlar hám internet aldawshılıǵınıń hár qıylı kórinisleri de ushırasıp atırǵanı atap ótildi. Usı múnásibet penen student-jaslardıń sanlı sawatlılıǵın arttırıw, olarda internetten qáwipsiz paydalanıw kónlikpelerin qáliplestiriw hám kiberjınayatlardıń aldın alıw úlken áhmiyetke iye ekeni atap ótildi.

Ilajda aǵa inspektor Shahruh Yuldashov tárepinen studentlerge internet arqalı júz beriletuǵın aldawshılıqlar, sociallıq tarmaqlar hám messendjerlerdegi jalǵan akkauntlar, gúmanlı siltemeler, bank kartaları maǵlıwmatların nızamsız qolǵa kirgiziw hám puqaralardıń jeke maǵlıwmatlarınan ǵárezli maqsetlerde paydalanıw sıyaqlı jaǵdaylar haqqında túsinikler berildi.

Sonday-aq, puqaralardıń iseniminen paydalanıp, olardı túrli jalǵan usınıs hám xabarlar arqalı aldaw usılları, bunday jınayatlarǵa aldanıp qalmaw ilajları hám kiberjınayatqa dus kelgende qanday háreket etiw kerek ekenligi haqqında usınıslar berildi.

Studentlerge bank kartası maǵlıwmatları, SMS arqalı keletuǵın tastıyıqlaw kodları hám jeke parollerin biytanıs adamlarǵa bermew, belgisiz siltemelerge kirmew, gúmanlı qońırawlar hám xabarlarǵa isenbew, sociallıq tarmaqlardaǵı akkauntların qorǵaw zárúr ekenligi ayrıqsha atap ótildi.

Ushırasıw dawamında jaslardıń huqıqıy mádeniyatın arttırıw, internetten paydalanıwda sergeklik hám juwapkershilikti arttırıw, sonday-aq, jaslardı hár qıylı kiberqáwiplerden qorǵaw hám huqıqbuzarlıqlardıń aldın alıw máselelerine de itibar qaratıldı.

Ilaj juwmaǵında student-jaslar ózlerin qızıqtırǵan sorawlarına juwaplar alıp, kiberjınayatlardan qorǵanıw hám jeke maǵlıwmatlardıń qáwipsizligin támiyinlew boyınsha zárúr maǵlıwmatlarǵa iye boldı.

Bul úgit-násiyat ushırasıwı studentlerdiń kiberqáwipsizlik boyınsha bilimlerin bekkemlew, huqıqıy sawatlılıǵın arttırıw hám internet ortalıǵında qáwipsiz minez-qulıq kónlikpelerin qáliplestiriwge xızmet etti.

NMPI baspasóz xızmeti.