Elimizde «Jasıl mákan» ulıwma milliy joybarı sheńberinde jasıl aymaqlar hám «jasıl belbew»ler jaratıw, qorshaǵan ortalıqtı qorǵawdı támiyinlew hám ekologiyalıq turaqlılıqtı bekkemlewge ayrıqsha itibar qaratılmaqta.

Mine, usı iygilikli maqset jolında Ózbekstan Respublikası prokuraturası uyımları dúzilgeniniń 35 jıllıǵı múnásibeti menen «Jasıl mákan» ulıwma milliy joybarı sheńberinde «Prokuraturanıń 35 jıllıǵına – 35 mıń túp terek» akciyası ámelge asırılmaqta.

Atap aytqanda, Qaraqalpaqstan Respublikası prokuraturasınıń baslaması menen Nókis qalasındaǵı «Jasıl baǵ» máhállesi aymaǵında 3 gektardan aslam paydalanılmay kelgen jer maydanı ózlestirilip, nál egiwge tayar jaǵdayǵa keltirildi.

Bul aymaqta shólkemlestirilgen ilaj Qaraqalpaqstan Respublikası prokurorı Sh.Aminovtıń basshılıǵında ótkerilip, nuranıylar, belsendi jaslar hám jámiyetshilik wákilleriniń qatnasıwında 4 mıń túpke shamalas yasin, qayraǵash, yapon saforası hám shınar nálleri egildi.

Ilajda Ájiniyaz atındaǵı Nókis mámleketlik pedagogikalıq institutınıń jámááti hám student-jasları da qatnasıp, aymaqqa terek nállerin egiwde belsene qatnastı.

Bul akciyadan gózlengen tiykarǵı maqset jasıl maydanlar kólemin keńeytiw, qorshaǵan ortalıqtıń tazalıǵın támiyinlew, aymaqtıń ekologiyalıq jaǵdayın jaqsılaw, sonday-aq, xalqımız, ásirese, jaslar arasında ekologiyalıq mádeniyattı arttırıw hám tábiyatqa abaylı qatnastı qáliplestiriwden ibarat.

NMPI baspasóz xızmeti.