Búgin, 2-noyabr kúni Ájiniyaz atındaǵı Nókis mámleketlik pedagogikalıq institutı akademiyalıq liceyinde «Direktor hám jaslar» ushırasıwı bolıp ótti.

Ilajda akademiyalıq licey direktorı Q.Qalxorazov elimizde oqıwshı-jaslardıń bilim alıwı ushın jaratılǵan imkaniyatlardı atap ótti.

Sonday-aq, Ózbekstan Respublikası Prezidentiniń «Intalı jaslardı tańlap alıw sisteması hám akademiyalıq liceylerdiń jumısların jetilistiriw ilajları haqqında»ǵı qararınıń áhmiyeti hám usı tiykarda ámelge asırılıp atırǵan jumıslar haqqında maǵlıwmat berdi. Atap ótilgenindey, qararda barlıq pánlerden joqarı kórsetkishke iye, pánler olimpiadası jeńimpazları hám jámiyetlik jumıslarda belsendilik kórsetken oqıwshılardı qollap-quwatlaw belgilengen.

Ushırasıwda akademiyalıq liceyde  semestr nátiyjeleri boyınsha barlıq pánlerden joqarı kórsetkishlerge iye bolǵan, intalı hám hár tárepleme belsendi 10 oqıwshıǵa «Akademiyalıq licey maqtanıshı» stipendiyası saltanatlı túrde tapsırıldı.

Álbette, bilimli hám hár tárepleme úlgili jaslarǵa qaratılıp atırǵan bunday itibar olarǵa úlken motivaciya bolıp xızmet eteri sózsiz.