Ájiniyaz atındaǵı Nókis mámleketlik pedagogikalıq institutında qábiletli student-jaslardı qollap-quwatlaw, olardıń innovaciyalıq potencialın júzege shıǵarıw, perspektivalı ideyaların ámeliy joybarlarǵa aylandırıw hám startap baslamaların qarjılay xoshametlew maqsetinde «Eń innovaciyalıq ideya» respublikalıq tańlawınıń birinshi – institut basqıshı bolıp ótti.

Tańlawda instituttıń bakalavriat tálim baǵdarları hám magistratura qánigeliklerinde bilim alıp atırǵan student-jaslar ózleriniń innovaciyalıq qollanbaları hám perspektivalı joybarları menen qatnastı.

Qatnasıwshılar óz joybarların 10 tiykarǵı baǵdar boyınsha usındı.

Tańlaw dawamında qatnasıwshılardıń innovaciyalıq qatnası, ideyalardıń jańalıǵı, ámeliy áhmiyeti, perspektivası hám olardı keleshekte startap joybarlar sıpatında ámelge asırıw imkaniyatlarına ayrıqsha itibar qaratıldı.

Esletip ótemiz, tańlawdıń institut basqıshı jeńimpazların múnásip xoshametlew maqsetinde tómendegi muǵdarda grant qarjıları ajıratılıwı belgilengen:

1-orın – 50 million sum;

2-orın – 30 million sum;

3-orın – 20 million sum.

Bul tańlaw jaslardıń ilimiy hám dóretiwshilik potencialın júzege shıǵarıw, olardı jańasha pikirlew, zamanagóy texnologiyalar tiykarında innovaciyalıq sheshimler islep shıǵıw jáne óz ideyaların turmısqa engiziwde úlken áhmiyetke iye.

NMPI baspasóz xızmeti.