11-noyabr – Ózbekstan kásiplik awqamları kúni múnásibeti menen Ájiniyaz atındaǵı Nókis mámleketlik pedagogikalıq institutında Ózbekstan kásiplik awqamları Federaciyası Qaraqalpaqstan Respublikası Keńesiniń baslıǵı Ulıqbek Jálmenov hám student-jaslardıń qatnasıwında ushırasıw shólkemlestirildi.

Qızǵın hám ashıq pikirlesiw ruwxında ótken ushırasıwda kásiplik awqamlarınıń jámiyetlik turmıstaǵı ornı, xızmetkerlerdiń miynet huqıqları menen nızamlı máplerin qorǵaw, jaslardı hár tárepleme qollap-quwatlaw, olardıń baslamaları menen usınısların júzege shıǵarıw máselelerine ayrıqsha itibar qaratıldı.

Ushırasıw dawamında student-jaslar ózlerin qızıqtırǵan sorawlar menen múrájat etip, oqıw ornındaǵı jaslardıń turmısın bunnan bılay da rawajlandırıw, olardıń sociallıq belsendiligin arttırıw hám kásiplik awqamlarınıń jumısın jetilistiriw boyınsha usınıs hám baslamaların bildirdi. Bildirilgen pikir-usınıslar hár tárepleme dodalandı.

Ilaj sońında kásiplik awqamları hám institut turmısında belsene qatnasıp, óziniń intakerligi, pidayılıǵı hám jemisli miyneti menen ayrıqsha úlgi kórsetip kiyatırǵan belsendi studentler hám jas xızmetkerler múnásip sıylıqlandı.

Ushırasıw jaslar hám kásiplik awqamları wákilleri arasında óz ara pikirlesiwdi bekkemlew, student-jaslardıń baslamaların qollap-quwatlaw jáne olardı jámiyetlik turmısta jáne de belsendi bolıwǵa xoshametlewge xızmet etti.

NMPI baspasóz xızmeti.