Ájiniyaz atındaǵı Nókis mámleketlik pedagogikalıq institutında pitkeriwshi kurs studentleriniń bántligin támiyinlew hám olardıń isbilermenlik baslamaların qollap-quwatlawǵa baǵdarlanǵan «Keleshekke qádem» baǵdarlaması sheńberinde «Basshı hám jaslar» ushırasıwı, sonday-aq, gezektegi seminar-trening shólkemlestirildi.

Ilajǵa «Ózmilliybank» AJ Qaraqalpaqstan Respublikası Bas basqarması baslıǵı K.Kazakov, usı basqarmanıń «Keleshekke qádem» joybarı menedjeri A.Eshmuratova, «Jaslar keleshegimiz» fondı Qaraqalpaqstan Respublikası filialı baslıǵı F.Saatbaev, «MIAMI EDUCATION» tur firması is basqarıwshısı D.Turǵunov, Anıq pánler fakultetiniń pitkeriwshi kurs studentleri qatnastı.

Seminardıń tiykarǵı maqseti – pitkeriwshi jaslardı miynet bazarına tayarlaw, olardıń kásiplik kónlikpelerin bekkemlew, jumısqa ornalasıw procesinde zárúr bolatuǵın bilim hám kónlikpelerdi qáliplestiriw hám isbilermenlik jumısların baslawǵa kómeklesiwden ibarat.

Seminar-trening dawamında qánigeler tárepinen miynet bazarında talap joqarı bolǵan kásip hám baǵdarlar, biznes reje islep shıǵıw tiykarları, startap joybarlardı jolǵa qoyıw hám qarjılandırıw imkaniyatları, jeńillikli kreditler hám mámleketlik baǵdarlamalar haqqında tolıq maǵlıwmatlar berildi.

NMPI baspasóz xızmeti.