Búgin, 17-iyun kúni Ájiniyaz atındaǵı Nókis mámleketlik pedagogikalıq institutında Konstituciyalıq reformalardı úgit-násiyatlaw, bul baǵdarda keń jámiyetshiliktiń pikir hám usınısların úyreniw, sonday-aq, búgingi kúnniń áhmiyetli ekologiyalıq mashqalalarına baǵıshlanǵan ushırasıw bolıp ótti.

Ushırasıwǵa Ózbekstan Respublikası Ekologiya hám qorshaǵan ortalıqtı qorǵaw mámleketlik komitetiniń baslıǵı N.Oblomuradov, Ózbekstan Ekologiya partiyası Qaraqalpaqstan Respublikalıq Keńesiniń baslıǵı A.Begimova, instituttıń Tábiyǵıy pánler fakulteti professor-oqıtıwshıları, belsendi student-jaslar hám ǵalaba xabar quralları wákilleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Búgingi kúnde Konstituciyaǵa ózgeris hám qosımshalar kirgiziwde keń jámiyetshiliktiń ekologiyalıq huqıqlar jáne qorshaǵan ortalıqtı qorǵaw máselelerine baylanıslı áhmiyetli usınısların úyreniw, globallıq klimatlıq ózgerislerdi esapqa alǵan halda Konstituciyaǵa arnawlı ekologiyalıq normalardı kirgiziw tiykarǵı máselelerdiń biri bolıp tabıladı.

Atap aytqanda, xalıqtı taza ishimlik suwı menen támiyinlew, atmosfera hawasınıń pataslanıwınıń aldın alıw, suw hám jer resurslarınan aqılǵa uǵras paydalanıw, biologiyalıq kóptúrlilikti saqlaw, jasıl ekonomikaǵa ótiw, klimatlıq ózgerislerge iykemlesiw hám Aral mashqalasınıń unamsız aqıbetlerin jumsartıw baǵdarında kóplegen pikir-usınıslar úyrenilip, Konstituciyalıq komissiyaǵa usınılmaqta.

Bunda ásirese, Aral teńiziniń ekologiyalıq apatshılıǵı aqıbetlerin jumsartıwǵa baǵdarlanǵan innovaciyalıq joybarlardı ámelge asırıw arqalı Aralboyı regionında ekologiyalıq hám social-ekonomikalıq jaǵdaydı, xalıqtıń jasaw sharayatın jaqsılawǵa úlken áhmiyet qaratılmaqta.

Ashıq sáwbetlesiw tárizinde ótken ushırasıwda professor-oqıtıwshılar hám studentler tárepinen xalıqtıń, ásirese, ósip kiyatırǵan jas áwladtıń ekologiyalıq mádeniyatın arttırıw, qorshaǵan ortalıqtı jasıl mákanǵa aylandırıw, biologiyalıq kóptúrlilikti saqlap qalıw baǵdarında orın alıp atırǵan mashqalalar hám olardıń sheshimleri boyınsha pikir-usınıslar bildirilip, sorawlarına juwaplar aldı.

Ushırasıwda komitet baslıǵı N.Oblomuradov institut málimleme-resurs orayına Ózbekstan Respublikasınıń «Qızıl kitabı»n sawǵa etti.

NMPI baspasóz xızmeti.