Usı jıldıń 8-10-dekabr kúnleri aralıǵında Tashkent qalasında voleybol boyınsha hayal-qızlar arasında V Ózbekstan superkubogi jarısı bolıp ótti.

Jarısta 2022-jılǵı Ózbekstan chempionı Qaraqalpaqstan Respublikasınıń Ájiniyaz atındaǵı Nókis mámleketlik pedagogikalıq institutı komandası hám Ózbekstan kubogi jeńimpazı Jizzaq wálayatınıń Jizzaq mámleketlik pedagogikalıq universiteti komandaları óz ara kúsh sınastı.

Quwanıshlısı, ótkerilgen eki oyında da NMPI voleybolshı qızları qarsılaslarına hesh qanday imkaniyat qaldırmadı – 3:0.

Solay etip, Qaraqalpaqstan Respublikasınıń Ájiniyaz atındaǵı Nókis mámleketlik pedagogikalıq institutı komandası voleybol boyınsha Ózbekstan superkubogi jeńimpazı hám absolyut chempionı boldı.

Jarıs juwmaǵında NMPI komandası aǵzalarınan N.Reyimbaeva «Eń kúshli oyınshı», A.Joldasbaeva «Eń jaqsı hújimshi» nominaciyaları boyınsha da jeńimpaz dep tabıldı.

Komanda aǵzalarınan M.Yuldasheva, G.Nuranova, G.Qulımbetova, U.Tolieva, I.Xojibaeva hám H.Tawmuratovalardıń kórsetken ájayıp oyınları búgingidey nátiyjeni qolǵa kirgiziwge tiykar boldı.

Jarısqa komandanı sport ustası Azat Kazakov hám joqarı kategoriyalı trener Atabek Kazakovlar tayarladı.

NMPI baspasóz xızmeti.