Ájiniyaz atındaǵı Nókis mámleketlik pedagogikalıq institutı muzıkalıq tálim baǵdarınıń 3-kurs studenti Aybek Jamalov Qazaqstan Respublikasında ótkerilgen «Ullı dala eli» atamasındaǵı xalıqaralıq etnofestivalǵa qatnasıp qayttı. Etnofestival usı jıldıń 3-5-avgust kúnleri Almatı hám Pavlodar qalalarında bolıp ótti. Onda tuwısqan túrkiy tilles 8 mámleketten kórkem óner sheberleri, jas háweskerler qatnastı. Ózbekstan hám Qaraqalpaqstan Respublikalarınan jerlesimiz, Nókis mámleketlik pedagogikalıq institutınıń studenti Aybektiń de qatnasıp, xalqımızdıń kórkem óneri, mádeniyatın dúnya xalıqları arasında kórsetip qaytqanlıǵı da biz ushın úlken maqtanısh esaplanadı. – Etnofestivalǵa Qazaqstan Respublikası Prezidentiniń atınan mirátnama kelgenligi meni úlken quwanıshqa bóledi, – deydi Aybek. – Festival joqarı dárejede shólkemlestirildi. Tuwısqan xalıqlar mádeniyatı hám kórkem óneri menen jaqınnan tanıs bolıp qalmastan, xalqımızdıń usı baǵdardaǵı eń jaqsı úlgilerin sheberlik penen atqarıwǵa háreket ettim. Kóplegen doslar arttırdım. Aybek Jamalov etnofestivalda qaraqalpaq xalqınıń «Bolmasa» hám basqa da qosıq jáne namaların alamoynaq duwtarda atqarıp, sonıń menen birge, tuwısqan qazaq xalqınıń milliy saz-namaların dombıra saz ásbabında joqarı dárejede atqarıp shıqtı. Maǵlıwmat ushın aytıp ótiw kerek, Nókis mámleketlik pedagogikalıq institutınıń studenti Aybek Jamalov 2014- hám 2016-jılları Qazaqstan Respublikasınıń Almatı qalasında ótkerilgen «Jas aqındar sayısı» xalıqaralıq tańlawında 1- hám 3-orın jeńimpazı bolǵan. Sonday-aq, 2017-jılı Almatıda ótkerilgen «Aqındar» xalıqaralıq tańlawına qatnasıp, 3-orındı jeńip alǵan. 2017-jılı dekabr ayında Nókis qalasında jas atqarıwshılar arasında ótkerilgen «Qutlı bolsın jańa jıl» baqsılar aytısında 2-orındı iyelegen. Islam Matekov, NMPI baspasóz xatkeri.