Búgin, 4-avgust kúni Joqarı bilimlendiriw, ilim hám innovaciyalar ministri, akademik Ibrohim Abdurahmonov Nókis qalasındaǵı Respublikalıq oyın túrleri hám jeńil atletika boyınsha qánigelestirilgen balalar hám jas óspirimler sport mektebinde ótkerilip atırǵan test sınaqlarınıń barısın kózden ótkerdi.

Sonday-aq, usı jerde abiturientlerdiń ata-anaları hám jaqınları menen sáwbetlesip, olardıń pikir hám usınısların tıńladı.

– Bizge siziń pikirlerińiz oǵada áhmiyetli. Óytkeni, biz bul processlerdi qalay shólkemlestirip atırǵanımız haqqında qalıs baha beriwshiler – bul sizlersiz. Pikir-usınıslarıńız aldaǵı waqıtlarda jumıslarımızdı jaqsı shólkemlestiriw ushın úlken áhmiyetke iye. Sonlıqtan, orınlarda usınday úyreniw jumısların alıp barıp atırmız. Biz bilimlendiriwdi tárbiya menen birgelikte alıp barıwdı maqset etkenbiz. Bunda, álbette, siziń qollap-quwatlawıńız bizge oǵada zárúr. Óytkeni, eń jaqsı pedagog – ata-analar, – dep aytıp ótti ministr sáwbetlesiw barısında.

Óz gezeginde, ata-analar da sózge shıǵıp, bıyılǵı qabıllaw procesinde jaslardı joqarı bilimlendiriwge qamtıw kórsetkishleriniń kóbeytilip atırǵanı, atap aytqanda, qaraqalpaqstanlı jaslar ushın mámleketlik grant tiykarında 3 mıń orınlıq kvota ajıratılǵanlıǵı, ata-analar ushın kútiw orınları shólkemlestirilip, olardıń pikir hám usınısları úyrenilip, mádeniy dem alıwı ushın barlıq sharayatlar jaratılıp atırǵanın atap ótip, óz minnetdarshılıqların bildirdi.

NMPI baspasóz xızmeti.