Joqarı bilimlendiriw, ilim hám innovaciyalar ministriniń buyrıǵı menen Eshmuratov Roxat Artikbaevich Ájiniyaz atındaǵı Nókis mámleketlik pedagogikalıq institutı ilimiy isler hám innovaciyalar boyınsha prorektorı etip tayınlandı.

Roxat Eshmuratov 1983-jıl Qaraqalpaqstan Respublikası Qońırat rayonında tuwılǵan.

Ol 2004-jılı Nókis mámleketlik pedagogikalıq institutınıń bakalavr baǵdarın, 2006-jılı Qaraqalpaq mámleketlik universitetiniń magistratura qánigeligin pitkergen. Biologiya ilimleriniń kandidatı, docent.

Ol miynet jolın 2006-2009-jıllarda Qaraqalpaq mámleketlik universiteti «Biologiya» kafedrasınıń assistentliginen baslap, Ózbekstan Respublikası Ilimler Akademiyası Botanika ilimiy-óndirislik orayınıń aspirantı, stajyor-izleniwshisi, kishi ilimiy xızmetkeri, 2012-2014-jıllarda Nókis mámleketlik pedagogikalıq institutı «Botanika» kafedrasınıń assistenti, ishki qadaǵalaw hám monitoring, ilimiy-izertlew hám ilimiy pedagog kadrlar tayarlaw bólimleri, sonday-aq, oqıw-metodikalıq basqarma baslıǵı sıyaqlı lawazımlarda jumıs islegen.

Tayınlawǵa shekem Nókis mámleketlik pedagogikalıq institutı «Botanika, ekologiya hám onı oqıtıw metodikası» kafedrasınıń baslıǵı lawazımında jumıs alıp barǵan.

NMPI baspasóz xızmeti.