Respublikamız boylap ótkerilip atırǵan «Jaslar forumı» sheńberinde Ájiniyaz atındaǵı Nókis mámleketlik pedagogikalıq institutında «Rektor hám jaslar» ashıq sáwbetlesiwi bolıp ótti.

Ilajǵa instituttıń jaslar awqamı jetekshileri, studentler keńesiniń belsendi aǵzaları, jas ilimpazlar, rektorǵa biriktirilgen «awır kategoriya»daǵı jaslar, jaslar tárbiyasına juwapker bolǵan qánigeler hám ǵalaba xabar quralları wákilleri qatnastı.

Ushırasıwda institut rektorı wazıypasın waqıtsha atqarıwshısı Quvondiq Qodirov mámleketimizde jaslar siyasatı baǵdarında ámelge asırılıp atırǵan jumıslar haqqında maǵlıwmatlar berdi.

Atap aytqanda, Prezidentimizdiń arnawlı pármanı tiykarında qaraqalpaqstanlı jaslar ushın joqarı oqıw orınlarına mámleketlik grant tiykarında 3 000, tólemli kontrakt tiykarında 7 000 orın ajıratılǵanı, sırt ellerde oqıp atırǵan jaslardıń oqıwın mámleketimizdegi joqarı oqıw orınlarına kóshiriw ushın berilgen jeńillikler, sonıń menen birge, jaslardıń kásip-óner úyreniwi, isbilermenlik penen shuǵıllanıwı, ilimiy-izertlew jumısların alıp barıwı ushın jaratılıp atırǵan sharayatlardıń áhmiyeti haqqında toqtalıp ótti.

– Mámleketimiz basshısınıń itibarı hám ǵamqorlıǵı nátiyjesinde institutımızdıń materiallıq-texnikalıq bazası zamanagóy tiykarda jetilistirilip, jańa oqıw imaratları, laboratoriyalar, sport kompleksleri, studentler turaq jayları qurılıp, oqıw menen ámeliyattı birgelikte alıp barıw imkaniyatlarınıń jaratılıp atırǵanlıǵı, álbette, Jańa Ózbekstan hám Jańa Qaraqalpaqstan ushın jetik pedagog kadrlar tayarlawǵa negiz jaratadı, – dedi Quvondiq Qodirov.

Ashıq sáwbetlesiwde studentler tárepinen jaslardıń bos waqıtların mazmunlı ótkeriw maqsetinde kitapqumarlıq, intellektual tańlawlar, sport jarısların ele de kóbeytiw, shet tillerin úyreniw boyınsha kurslar shólkemlestiriw, jaslardı zamanagóy kásiplerge oqıtıw boyınsha pikir-usınıslar bildirildi.

Jaslar tárepinen bildirilgen usınıslar, múrájatlar tiykarında «Jol kartası»n islep shıǵıw boyınsha tiyisli juwapkerlerge tapsırmalar berildi.

Institutta «Jaslar forumı» sheńberinde ilajlar dawam etedi.

NMPI baspasóz xızmeti.