Usı jıldıń 14-19-yanvar kúnleri aralıǵında Buxara qalasında «Universiada-2025» sport jarıslarınıń voleybol sport túri boyınsha respublikalıq final basqıshı bolıp ótpekte.

Jarısqa Qaraqalpaqstan Respublikası, Tashkent qalası hám barlıq wálayatlardıń saylandı komandaları qatnaspaqta.

Búgin, 16-yanvar kúni sport veteranı Azat Kazakov basshılıǵındaǵı Qaraqalpaqstan Respublikası qızlar saylandı komandası jarıstaǵı dáslepki oyının ótkerdi. Joqarı tájiriybege iye bolǵan Tashkent wálayatı saylandı komandası menen bolǵan oyında voleybolshı qızlarımız 25:14 hám 25:17 esabında qarsılaslarına hesh qanday imkaniyat qaldırmadı.

Solay etip, voleybol boyınsha Qaraqalpaqstan Respublikası qızlar saylandı komandası «Universiada-2025» sport jarıslarınıń respublikalıq final basqıshın jeńis penen basladı.

Maǵlıwmat ornında atap ótiw kerek, respublikamız saylandı komandası quramı Ájiniyaz atındaǵı Nókis mámleketlik pedagogikalıq institutı hám Berdaq atındaǵı Qaraqalpaq mámleketlik universitetiniń sheber sportshı studentlerinen ibarat.

Qızlarımız kelesi oyının erteń, 17-yanvar kúni Ferǵana wálayatı saylandı komandasına qarsı ótkeredi.

Respublikamız komandasına «Universiada-2025» sport jarıslarınıń respublikalıq final basqıshında áwmet hám jeńisler tileymiz!

NMPI baspasóz xızmeti.