Ájiniyaz atındaǵı Nókis mámleketlik pedagogikalıq institutında «Studentler teatr studiyası festivalı» bolıp ótti.

Student-jaslardıń teatr ónerine bolǵan qızıǵıwshılıǵı hám mádeniy-aǵartıwshılıq jumıslardıń nátiyjeliligin arttırıw jáne talantlı jaslarǵa óz imkaniyatların júzege shıǵarıw ushın sharayat jaratıw, sonday-aq, olardı xoshametlew maqsetinde shólkemlestirilgen festivalǵa instituttıń barlıq fakultetlerinen komandalar qatnastı.

Festivalda studentler jaslar turmısında ushırasatuǵın túrli waqıyalar, ata-ananı qádirlew, shańaraqlıq mashqalalar, elimizde jaslar ushın jaratılıp atırǵan imkaniyatlar, olardan nátiyjeli paydalanıw sıyaqlı temalar menen birgelikte, ata-babalarımızdıń búgingidey jaqtı kúnlerdi árman etkenligi, bul jolda úlken qıyınshılıqlardı bastan keshirgenligi haqqında sóz etetuǵın saxnalıq kórinislerdi tamashagóylerdiń názerine usındı.

Studentlerdiń saxnalıq sheberlikleri tóreshiler quramı aǵzaları tárepinen bahalandı.

Solay etip, festival juwmaǵında:

1-orın – Filologiya fakulteti;
2-orın – Anıq pánler fakulteti;
3-orın – Mektepke shekemgi hám baslawısh tálim fakulteti komandasına nesip etti.

Sonıń menen birge, Filologiya fakultetiniń studenti Dáwran Seytmuratov «Eń jaqsı erkek roli», Anıq pánler fakultetiniń studenti Dilfuza Kewlimjaeva «Eń jaqsı hayal roli», Mektepke shekemgi hám baslawısh tálim fakultetiniń studenti Asqar Abdullaev «Komandanıń dóretiwshi studenti», Anıq pánler fakulteti dekanınıń orınbasarı Xalmurat Esemuratov «Eń jaqsı studentler teatr studiyası basshısı» nominaciyalarınıń jeńimpazı dep tabıldı.

Jeńimpazlar hám sıylı orın iyelerine institut rektoratı tárepinen diplom hám kásiplik awqamı komiteti tárepinen sawǵalar tapsırıldı.

NMPI baspasóz xızmeti.