Ájiniyaz atındaǵı Nókis mámleketlik pedagogikalıq institutı Mektepke shekemgi hám baslawısh tálim fakultetinde dekannıń hayal-qızlar máseleleri boyınsha másláhátshisi Sulıwxan Palwaniyazova baslaması menen 8-mart – Xalıqaralıq hayal-qızlar kúni bayramına arnalǵan «Qánekey, qızlar!» tańlawı bolıp ótti.

Tańlawda institut rektorınıń hayal-qızlar máseleleri boyınsha másláhátshisi Sayyora Bekchanova hám fakultet dekanı Muhabbat Allambergenova sózge shıǵıp, jámiyetimizde hayal-qızlardıń ornı, olardıń belsendiligin arttırıwdıń áhmiyeti haqqında aytıp ótti hám ilaj qatnasıwshıların jaqınlasıp qalǵan bayram menen qutlıqladı.

Tańlawda fakultettegi oqıw hám jámiyetlik jumıslardaǵı ayrıqsha belsendiligi, ziyrekligi hám qábileti menen teńleslerine úlgi bolıp atırǵan student-qızlar qatnasıp, belgilengen shártler boyınsha óz imkaniyatların sınaqtan ótkerdi.

Ilaj juwmaǵında jeńimpazlar hám sıylı orın iyeleri anıqlanıp, diplom hám kásiplik awqamı komiteti tárepinen bayram sawǵaları menen sıylıqlandı.